Wembley-ah Klitschko a tlu Anthony Joshua a ngam lo

British boxer rothap Anthony Joshua chuan 'boxer satliah' a ni lo tih pholan nan Pathianni zing khan Wladimir Klitschko chu Wembley Stadium-ah technical knockout hmangin a hneh a, IBF heavyweight kawnghren a kawl sa bakah WBA heavyweight title a dawn belh leh ta.

Mipui 90,000 pung­khawm hmaah boxer pahnih inhnek a hmuhnawm takzet - boxer pahnihin chak tumin an in nawr a, boruak a sang hle. Round ruknaah inhnek a hmachhawn tawh 19-a a vawi khat nan Anthony Joshua hnek tluk a ni a, mahse British boxer hian tlawm duh loin a tho leh.

Round 11-naah erawh Joshua inlar hun a ni. Kum 27-a upa boxer hian kum 41-a upa ni tawh Klitschko a chau tih hriain a chhawr ṭangkai a, vawi hnih ngawt a hnek tlu hman. Mahse, Ukrainian boxer rothap hi tlawm duh loin a tho lehzel a, a vawi thumnaa Joshua-a'n hnek tluk ngei tuma a hmaia a 'khilai' mawlh mawlh laiin referee David Fields chuan inhnek a titawp - Joshua a chak.

Joshua a ropui

May 2014 khan Wem­bley Stadium-ah Carl Froch leh George Groves-te WBA leh IBF super-middleweight kawnghren inchuhin an inhnek a, Joshua chu he boxer pahnih inhnek hmaa inhnek zinga mi ve mai chauh a ni. Kum 2017 a her chhuah meuh erawh chuan boxer ropui Klitschko hnehin Wembley-ah Joshua a ding ta!

Joshua promoter Eddie Hearn chuan a boxer hi British sports khawvela mi lar berah a la siam tur thu a sawi a, a thusawi hi a thleng dik a nih pawhin a mak lo ang. Joshua leh Klitschko inhnek hi US-ah HBO leh Showtime television channel ten an chhuah a, boxing chanchina US-a channel pahnihin inhnek pakhat an tihchhuah vawi thumna chiah a ni.

Chul thei lo Klitschko

Joshua nen an inhma­chhawn hmain Klitschko-a'n Mount Everest ang maia tawhkhirh a nih thu a sawi a, Ukrainian boxer a ṭawng sual lo. Joshua hmaah tlawm mah se a kum zat ngaihtuahin Klitschko-a'n a daih rei a, Tyson Fury a hneh loh ṭuma a inhnek dan ngaihtuah phei chuan Klitschko hian kum 40 pelh tawh lamah pawh hmasawnna a nei tih hmuh turin a awm - German broadcaster RTL nena an contract-ah inhnek pathum a la neih avangin boxing a la chawlhsan mai lo ang.

Vawi 69 inhnek a hma­chhawna a vawi nga nana tlawm Klitschko chuan, "Mipui ten inhnek hmuh­nawm tak in en ka beisei. Vawiinah hian boxer ṭha zawkin hnehna a chang a ni. Boxing tan chuan hun danglam bik a ni a, boxer pahnih inhmachhawn karah a ṭha zawkin hnehna a chang a ni. Hnehna chan ngei tumin ring chhung ka lut a, mahse ka beisei ang ka hmu lo. Anthony hi ka lawmpui takzet a ni," a ti.

Joshua a hlim

Vawi 19 inhnek a hma­chhawna hnehna chang vek Joshua chuan , "Klitschko hi ka hneh thei tih ka hria a, round tinah khan ka inzir belh zel a ni. Inhnek tur ringawtin ka lokal lo a, mite tana natna thlen tura lokal ka ni. Klitschko zah tak chunga ka sawi duh chu, amah tih nat kha ka tum ber a ni," a ti.

Joshua chuan sawi chhunzawmin, "A tawpah chuan Klitschko hneh dan ka zir chhuak a, ka hneh ta a ni. Wembley-ah hian ka inhnek leh ngei ang a, min hmu leh ang. Training naah round 11 thleng khelh chang ka nei a, ka hah ṭhin takzet. Mahse, thui tak kal tur ka nei tih ka hriat avangin ka bei ṭauh ṭauh zel a ni. Zaninah khan gym-a ka thawhrim rah hmuh turin a awm a, boxing hi thil awlsam tak a ni lo," tiin a thawhrim thu a sawi.