United leh City chak zo lo
Jose Mourinho kaihhruaina hnuaiah Manchester United chuan Swansea 1-1 in an inhnehtawkpui a, tun season Premier League match bikah Old Trafford-a an khingpui vawi 10 an inhnehtawkpuina chiah a ni. Inkhel dangah Manchester City chuan Middlesbrough lakah point khat an hlawh chhuak hram bawk.
United tan captain Wayne Rooney-a'n chawlhlawk hma chiahin penalty aṭangin goal hmahruai a khung a, Swansea lam hian minute 79-naah Gylfi Sigurdsson free kick pet luh mawi zet hmangin an sut. Swans hian point 32 hmuin 18-na an ni a, an chung chiaha awm Hull City nen an inkarah point hnih a awm.
Man United hian point hnih an hloh a ni satliah lo a, defender Luke Shaw leh Eric Bailly te chu hliam vangin an chân bawk. Zlatan Ibrahimovic, Paul Pogba, Chris Smalling, Phil Jones leh Marcos Rojo te hliam vanga an chawlh mek bawk avangin Mourinho tan a luhai thlak ve khawp ang.
Mourinho naute hian Europa League khel turin Ningani zanah Celta Vigo khelmual an pan nghal a ngai dawn a, an league match khelh hmabak pahnih chu Arsenal leh Tottenham khelmualah a ni bawk.
Manchester United manager Mourinho chuan, "Point kan hloh bakah player kan chan bawk a, kan tan ni duhawm lo tak a ni. April thla chhunga match kua kan khelhna a ni a, ka player-te an chau, mihring pangngai tan a harsa a ni. Squad-a player 22 kan neih kha tunah chuan 13 velah kan tlahniam ta bawk," a ti.
Pathianni zan inkhelah dangah Manchester City chuan ṭum hnih goal an phurh hnuah Middlesbrough chu 2-2 in an inhnehtawkpui ve bawk. Boro tan hian Alvaro Negredo leh Calum Chambers te goal khung chu City hian Sergio Aguero leh Gabriel Jesus te hmangin an sut a, khualmualah point khatah an lungawi a ṭul.
Season thara Champions League khelh tum United hian match 34 an khelh aṭangin point 65 an hmu a, table-ah pangana an ni. United chung chiaha awm City hian point 66 an hmu thung a, pathumna Liverpool nen an point a inzat.
Zanin dar 12:30-ah hian Premier League inkhel pakhat a awm dawn, season thara Champions League khelh tum Liverpool chu Watford khelmualah an lenglut ang.