Chelsea-in champion hnaih zel

Premier League hma­hruaitu Chelsea-in champion nomawi an hnaih zel a, nizan khan an hma­hruaina chhawm nung turin Everton chu khualmualah 3-0 in an sawp.

Goodison Park-a inkhelah first half-ah goal hmuh tur awm lo mah se chawlhlawk hman a nih hnuah Blues-in an theihna tak tak an pholang a, goal thum ngawt an khung. Minute 66-naah Pedro a inlar a, Spanish midfielder hian yard 25 aṭang-in goal ropui a khung.

Chelsea an phur tawlh tawlh a, goal khatah lung­awi an tum lo. Minute 79-naah Eden Hazard free kick chu goalkeeper Maarten Stekelenburg-a’n lo dang per mah se Gary Cahill-a bulah tak a tla a, English defender hian a chance neih a hlah lo.

Hun tawp nan minute li chiah a awm tawh tihah Willian chuan Blues chak nemnghehna goal a khung a, Cesc Fabregas hnen aṭanga a ball hmuh ṭha tak chu goal-ah a chantir - hun a tawp a, Chelsea tan Premier Legaue nomawi chawi turin an match hmabaka Middlesbrough, West Brom, Watford leh Sunderland an hma­chhawn huna match thumah hnehna an chan chuan an champion ang.