Mizoram an chak vek

National Junior Football Championships (BC Roy Trophy)-ah Mizoramin nimin khan Jharkhand 2-1 in an hneh a, group stage-ah an khing­pui an hneh vek.

Bhillai, Chhattisgarh-a inkhelah Jharkhand-in minute 10-na lekah goal hmahruai khung mah se minute 32-naah Mizo­ram hian North Vanlalphai rawlthar Lalruat­puia hmangin an sut a, Thingkah rawlthar Lalrem­mawia'n minute 56-naah chakna goal a khung.

Mizoram hian Uttarakhand (5-0) leh Delhi (2-0) a hneh bawkin point kaw hmuin Group B hmahruaitu an ni a, May 3 hian semifinal-ah Group D hmahruaitu an hmachhawn ang.

Group D hian vawi­inah an match hnuhnung ber an khel dawn a, West Bengal chu dinhmun ṭha ber niin Goa leh Tamil Nadu ten chance an nei a, Assam-in beisei tur an nei tawh lo.

Mizoram coach C. Vanlalhriatrenga chuan, "Inhliam kan ngah deuh a, khawlum leh ei in avanga pum nuam lo kan ngah deuh a, kan zia ve hret hret zel e. Kan inzir dan ang tak la lang chhuak vek lo mah se hnehna kan chan avangin kan lawm tak zet zet a ni," tiin Vanglaini a hrilh.