Real vanneih zanah Barca chak ; La Liga nomawi chawi tur a chiang lo
Spanish La Liga-ah inum boruak a sang chho zel - Real Madrid chuan hun tawp dawna Marcelo goal khung hmanga Valencia 2-1 a an hneh laiin Barcelona an tlawm duh bik lo a, Madrid khaw club hi thlahfal lutuk an duh lo tih pholan nan Espanyol chu 3-0 in an sawp.
Atletico Madrid-in champion nomawi beisei thei tawh lo mah se Champions League erawh khelh an la tum reng tih an pholang a, khualmualah Las Palmas chu 5-0 ngawtin inkhelh an zirtir.
Ronaldo ropuina
Real Madrid-in khualmuala an ngam loh hnu Valencia an mikhual a, tlawm nawn an duh tawh lo. Minute 27-naah Cristiano Ronaldo hmangin goal hmahruai an khung a, Valencia tan Dani Parejo-a'n minute 82-naah an si phurh a sut avangin an in draw mai dawn niin a lang hman. Mahse, hun tawp nan minute li chiah a awm tawh tihin Marcelo chuan chakna goal a khung a, Real tan nomawi a hnai zel.
Ronaldo-a'n goal a khung piah lamah penalty aṭanga a hun ṭha neih hla mah se record a siam tho a, Portuguese forward hi Europe-a league sang paruka goal khung hnem ber a ni ta - Primeira Liga, Premier League leh La Liga-ah goal 367 a khungna chiah a ni a, kum 46 zet khum loha awm tawh Tottenham leh Chelsea striker hlui Jimmy Greaves-a record league goal 366 chu a khum a ni.
Zidane thukhawchang
Ronaldo-a'n record siam nan goal khung mah se hun tawp dawna Real chakna goal khungtu chu Marcelo a ni a, a defender ṭha hi Real manager Zinedine Zidane chuan a fak hle.
Zidane chuan, "Minute khati zat nghah ngai kher lo khan chak thei ila chu duhthusam a ni a, mah se chutihrual chuan kan goal khan engtik hunah pawh eng player hmang pawhin goal kan khung thei tih a pholang a ni. Marcelo leh Dani Carvajal kha an khel ṭha takzet a, khawvela full back ṭha pawl an ni," tiin a hlim hle.
Barca chakna Suarez
Barcelona-in La Liga-a an hmahruaina chhawm nung turin Catalan derby-ah Espanyol chu 3-0 in an ngam a, Lionel Messi-a'n goal khung lo mah se Luis Suarez chuan goal hnih khungin Ivan Rakitic-a'n goal khat a thawh ve bawk.
Luis Enrique-a nauten inkhel thunun mah se first half-ah MSN tia hminglem an pek Messi, Suarez leh Neymar-ten target-ah shot vawi khat pawh an nei lo a, chawlhlawk hman a nih hnuah erawh 'team thar' an ni. Minute 50-naah Suarez-a'n midfielder Jurado tihsual zarah goal hmahruai a khung a, Messi-a'n goal khung lo mah se minute 76-naah Espanyol player rual a bum hnuah Rakitic-a tan an goal hnihna tur a siamsak a, Espanyol left-back Aaron Martin tihsual nangchingin Suarez chuan goal thumna a khung bawk - Barca an chak chiang hle.
Beidawng lo Barca
Barcelona manager Luis Enrique chuan, "Thil tum chiang tak pahnih kan nei a, chu chu Spanish Cup leh league nomawi chawi a ni. Kan tum hlen turin kan theihna zawng zawng kan pe ang," tiin nomawi pahnih tal chawi a tum.
La Liga-ah Barcelona hian hmahruai mek mah se an hnuai chiaha awm Real aiin match khatin an khel tam zawk a, match thum bak khelh tur an nei tawh lo.
Atletico chak chiang
Diego Simeone-a nauten Las Palmas khelmualah hnehna chang turin harsatna an nei lo. Kevin Gameiro chuan minute hnihna lekah goal hmahruai a khung a, Saul Niguez-a'n minute 17-naah chhunzawm ve lehin Gameiro hian a goal hnihna a khung leh bawk. Chawlhlawk hman a nih hnuah pawh Atletico-in goal khung an ṭhulh lo a, Thomas Partey leh Fernando Torres ten goal khat ve ve khung ve lehin 5-0 in hnehna an chang.
Atletico boss Simeone chuan, "Ṭha takin inkhel bul kan ṭan a, ka naute fak hi ka ning thei lo a ni ber. Ni li liam ta lawkah khan kan chak lo a, mah se vawiinah erawh inthing harhin minute 18 chhung lekin engkim kan chingfel a ni," tiin a naute khelh danah a lawm hle.