German champion Bayern Munich
Bayern Munich chu a zawna season nga chhung Bundesliga champion ni thei hmasa ber an ni ta. Inrinni zan khan Bayern hian Wolfsburg 6-0 in an luhchhuah a, inkhel dangah RB Leipzig an chak zawh loh avangin inkhelh hmabak pathum la awm mah se Carlo Ancelotti naute hi lehpelh theih an ni tawh lo.
Bayern tan hian an champion-na inkhelah Robert Lewandowski chuan goal hnih a khung bakah David Alaba, Arjen Robben, Thomas Muller leh Joshua Kimmich ten goal an khung. Table 14-naa awm Wolfsburg hi relegate thei dinhmunah an la ding thung a ni.
Fak phu Ancelotti
Pep Guardiola-a'n a chhuahsan hnuah Bayern hian Ancelotti an lalut. Italian manager hian league match 31 a kaihhruai tawh chinah vawi hnih chiah chak loh an nei a, ṭum sarih chu an khingpuite nen inhnehtawkinin vawi 22 an chak.
Bayern hian league-ah goal 79 khung tawhin an lamah vawi 17 chiah a la lut a, Wolfsburg an sawp chiah khan match nga ngawt mai goal nga aia tam an khungna a ni bawk.
Kum 57-a upa Ancelotti hian tun hmain AC Milan, Chelsea leh Paris St-Germain te chu a enkawl ṭan season hian league-ah champion pui vek. Bayern a champion pui leh takah chuan Europe-a league lian pangaah, a kum khatnaa team pali champion pui thei hmasa ber niin league nomawi a chawi lohna hmun Spain-ah pawh Real Madrid chu Champions League-ah a champion pui tho.
Italian manager Ancelotti chuan, "Player ṭha bik leh fans ropui tak ka neih avangin ka vannei hle. Fans hian season tluanin min ṭawiawm ṭha hle a, ka nauten khelmual chhungah mawi taka football an khelh bawk avangin nomawi chawi hi kan phu," tiin a sawi.