MSL Play In ; Hotshots lakah Tuikual South an chak
Mizoram Super League awm tirh aṭanga team awm tawh, hmuhnawm leh boruak nung tak nei ṭhin Tuikual South chuan an nihna an la hloh lo. TKS hian Thawhṭanni zan Play In game 1-ah Mission Veng Hotshots chu 94-84 in an hneh.
Zanin dar 8:30 hian R. Dengṭhuama Indoor Stadium, Mualpuiah game 2 an khel leh nghal dawn. Tuikual South hi an chak a nih chuan semifinal an lut dawn, table-a pakhatna leh pahnihna inkhel chak lo zawk nen an inhmachhawn leh ang.
Nizan khan champion lai Zarkawt BCA leh vawi hnih champion tawh Khatla TBL te an inhmachhawn a, league hmahruaitu leh an hnuai chiaha awmte inkhel result hi kan hre hman lo thung - BCA an chak a nih chuan an tlang nghal dawn.
Inkhel chu
Team thar MSV Hotshots lamin bul an ṭan fuh, quarter khatna lai chuan point 10 chuanga hmahruai lai pawh an nei, mahse quarter hnihna an khelh ṭan meuh chuan Tuikual South lamin hma an hruai let leh hman tawh.
Hotshots tan Josua Aaron Keyes chuan 3 point vawm lutin a team hi point khatin hma a hruaipui, mahse second 30 vel chauh awm tawhah TKS tan Dennis Lalmuanpuia chuan basket rawn nei zeuhin, Phengphehlep lamin chawlhlawk laiin point khatin hma an hruai.
Chawlhlawk hnuah hma an inhruai chhawk tawn zak zak, quarter thumna laihawl aṭangin TKS an sang fal hret hret a, hamrik hnuhnung a rik ruala Bowie-a 3 point neih hmangin point riatin an sang fal a, minute 10 dang an la hmabak.
Hotshots lamin minute riat khelh tur la awmah time out vawi khat chauh an nei tawh a, point 14 zetin an hniam fal. Amaherawhchu, coach David Lalruatfela enkawl team hi an chiai duh lo a, fimkhur leh huaisen takin an nawr let.
Minute hnih awm tling tawh loah TKS lamin point 17 in hma an hruai fal, player ṭha Bowie an dah ṭha. Mahse, MSV lamin a ngai patin an nawr thung a, 'layup' mawi tak tak leh Keys-a dunk hmangin an inkar an sawr zim - point kuaah an sawr zim thla kawk hman.
Tuikual tan Bowie dah luh leh a ngai, a rawn luh leh hnuah basket a rawn nei zauh zauh a, inkhel kal lai timuangin hun a hman zawhpui a ni. Game 2 an khelh hunah pawh ani hi player pawimawh leh innghahna a ni leh ang.
A hmuhnawm
R. Dengṭhuama Indoor Stadium, Mualpuiah Tuikual South lamin fans an nei ṭha zawk, season danga ṭantu an ngah ṭhin avangin hei chu thil mak a ni hran lo. An player an au phur ṭha em em a, an khingpui lamin time out an lak laia bengchheng an lo siamte chu boruak tinungtu a ni.
Senior player F. Zodinthara chu mi pawimawh a la ni reng, hla deuh tak aṭanga 3 point a rawn neih zauh laite chuan thawm a ṭha thei hle. 6ft 8in a sang Bowie-a'n a zawna 3 point a vawm lutte chu MSL tihmuhnawmtu a ni a, zaninah pawh a hmuhnawm leh dawn.
Phengphehlep hian an hla hman thiam, "Phengphehlep ṭial mawite... Tuikual an hrut del del," tih an la sa ring tawk lo deuh, zaninah an hla hman thiam sa chung ngeiin tun hma lama an lo tih tawh angin an khingpui 'Bye Bye' an tum ang.
Inkhel inhnehtawk takah TKS an vannei zawk a, match erawh a la zo lo. Game 1 inkhelh banah Bowie-a'n Keys chu a hnunglam aṭangin a nam zeuh a, American player hian hnung lam aṭangin a su zui let ve sak bawk, zanin inkhel tihmuhnawmtu an ni dawn.
Hotshots hian tualchhung player pawh an nei chhe bik lo. Eddie Zaithanmawia, Lalrozama leh Zonunsanga te hi chak pui tham an ni ve tho a, game 1-ah tlawm mah se bei let turin theihna an la nei, mahse basket lam venhim erawh an zir belh zeuh a ngai ang.
League round-ah pawh MSV Hotshots hian vawi hnih ngawt an hneh thei, chuvangin Tuikual South tan ngaihṭha taka awm ngawt a la rem bik lo. Zaninah erawh team pakhat zawk an tlang a ngai dawn, thih leh dam kara leng an nih avangin theihtawp an chhuah lehzual ang.