Hmalam panin Rafael Nadal a kal

Wimbledon bikah chuan Rafael Nadal-a'n thawm a nei hluai hran lo a, a khelh dan erawh a thawm a ring hle thung. Thawhṭanni zan last 16 inkhelah Nadal hian Botic Van De Zandschulp chu 6-4, 6-2, 7-6(6) a hnehin quarterfinal a lut.

Nadal hian kuminah Australian Open leh French Open nomawi a chawi tawh. Kum khat chhunga Grand Slam nomawi pali chawi vek thei nih a tumna kawng a la zawh dik zel; hmabak hlen chhuah tur erawh a la tam.

Nadal nge nge
Kephah, khup leh khelbawr hliam vangin Nadal hi a buai fo a, nikum phei kha chuan tennis chawlhsan a tum hman hial. Mahse, beisei phak baka ṭhain a lo kir leh mek a, tunah chuan a vawi thum nan Wimbledon title lak ngei a beisei leh thei ta.

Grand Slam vawi 22 champion tawh Nadal chuan, "Game duhthusam vek ni lo mah se, a tir aṭanga a tawp thleng thlirkir chuan ka ti ṭha thawkhat viauah ka ngai. Kum thum hnua quarterfinal ka lut ve leh ta te hi thil lawmawm a ni," tiin a sawi.

Nadal hian match point a hmuh hmasa pathum chu a chhawr ṭangkai nghal mai bik lo. World number 25 Van de Zandschulp-a'n thapui a thawh ve tlat avangin a awlsam bik lo, a tawpah erawh player ṭha zawk chu a dingchang.

Spanish star hian a match lehpekah chuan Taylor Fritz a hmachhawn leh dawn. American player hian a vawi khat nan major tournament-ah quarterfinal a invaw kai, inkhel dangah Jason Kubler chu 6-3, 6-1, 6-4 in a lo hneh ve thung a ni.

Kyrgios chak zel
Nick Kyrgios-a'n Wimbledon quarterfinal a in vaw kai leh ta, a thlen chin chuan mi tam tak a barakhaih ngei a rin thu a sawi leh ta hmiah mai. A inkhelh thiam bakah a nunchang danglam vangin Australian tlangval hian mi hriat a hlawh.

All England Club-a inkhelah Kyrgios hian Brandon Nakashima chu 4-6, 6-4, 7-6 (7-2), 3-6, 6-2 in a hneh. Tun hnai kum sarih chhungin major tournament-ah a thiam pariat zinga a tel lehna hmasa ber a ni hial.

Kum 27 mi Kyrgios chuan, "Tun hnaiah tennis ka khel tam hle. Wimbledon quarterfinal han thlen chiah chu rilru pawh a danglam, ka nungchang vanga min sawiseltute chhan ka tum hran lo a, nuamti takin ka inkhel mai a ni," a ti.

Australian tlangval hian servcie a neih ṭha tak a la chhawr ṭangkai reng, tun ṭumah pawh hian vawi 35 ngawt aces a siam, a service ṭha chu a chakna hnar a la ni chhunzawm zel - a match lehpekah chuan Cristian Garin a hmachhawn ang.