PSG-in Poch an ban; Galtier an lalut zui

Paris St-Germain chuan coach Mauricio Pochettino an ban thu an puang a, Argentine coach an ban hnu lawkah hian Christophe Galtier chu an coach thar ni turin an lalut bawk.

PSG chuan, "Mauricio Pochettino chu PSG coach a ni tawh dawn lo a, he club tana a staff-te nena an hnathawh avangin lawmthu kan sawi a, an hma hun atan duhsakna sang ber kan hlan a ni," an ti.

Kum 50 mi Poch hian season hman zawh takah khan mahni muala league match 19 an khelhah PSG hi a tlawmpui miah lo a, Ligue 1 nomawi a chawipui.

Mahse, Lionel Messi nei chungin Champions League last 16 aṭangin an tla a, champion zui ta Real Madrid lakah an tlawm. PSG hian first leg-ah 1-0 in hnehna an chang a, second leg-ah pawh goal khung hmasain, 1-0 in hma an hruai.

CL quarterfinal lut mai tura ngaih an nih laiin, second half-ah Karim Benzema chuan hattrick a siam a, 3-2 in an tlawm ta daih - European champion nih châka tuihal PSG tan pawm dam a harsa a, a tawpah Poch-a'n a tuar ta.

Poch hian nikum January khan Thomas Tuchel thlakin PSG a enkawl ṭan a, Ligue 1-ah tuna amah thlaktu, Galtier-a enkawl Lille phak loin champion zo lo mah se Coupe de France leh Trophee des Champions-ah nomawi an chawi.

Chu chauh a ni lo - a thlak tak Tuchel aiin points-per-game-ah a hmu hnem zawk a, PSG-a enkawl tirh hian superstar rual kawl an nih avangin team boruak a ṭha lo hle bawk.

Mahse, Poch hian team boruak ṭha lo a beng dai thei a, left back pasarih ngawt an kawl leh number 1 keeper pahnih an neihte chu team boruak chhiat phah nan an hmang lo - Tottenham Hotspur boss hlui hian fak a hlawh hle.

Season hman zawh takah league nomawi a chawi zui a, mahse, Champions League-a mualphona chuan a chhanhim zo ta lo a ni.

Poch thlaktu Galtier hian kum hnih chhung atan contract a ziak a, kum khat dang pawhsei theih a ni - Ligue 1-ah Lille champion pui tawhin, season hman zawh takah khan Nice chu Coupe de France final a luhpui a, Saint-Étienne chu 2013 khan Coupe de la Ligue-ah a champion pui bawk.

Mahse, kum 55 mi coach hian European football-ah sulhnu ropui sawi tur a nei lo a, PSG a kaihhruai dan tur hi hmuh a châkawm ta hle.