Barca-in Kessie leh Christensen lalut

La Liga club Barcelona chuan Franck Kessie leh Andreas Christensen te chu free transfer-in an lalut a, player pahnih hian Nou Camp-ah kum li chhung hun hmang turin contract an ziak ve ve.

Kum 25 mi Kessie hian season hman zawh takah khan AC Milan chu Serie A-ah a champion pui a, Italian club hian chelh duh mah se Xavi hnuaia khelh a duh avangin Barca a pan ta zawk.

Ivorian midfielder Kessie hian season hman zawh takah khan Milan tan inelna hrang hrangah match 39 khelin goal sarih a khung a, assist vawi khat a nei bawk.

Ivory Coast tan match 58 inlana goal ruk khungtu hian Rossoneri (AC Milan sawina) ah hun a hman chhungin match 224 a khel hman a, goal 39 a khung - Barca hian a duh tana pound maktaduai 430-a leichhuah theih turin release clause an ziah telpui.

Kessie ruala Barca pantu Christensen hi Chelsea academy aṭanga inzir chhuak a ni a, Blues legend turin tam takin beisei mah se Danish centre back hian Barca tana khelh a châk tlat.

Chelsea tan match 161 khel hmanin goal hnih leh assist vawi hnih a nei a, Bundesliga club Borussia Mönchengladbach-ah season hnih chhung loan-in a khel hman bawk.

Denmark tan vawi 56 inlana goal hnih khungtu hian Champions League, Europa League, UEFA Super Cup leh FIFA Club World Cup-ah te Chelsea a champion pui hman a, league nomawi erawh a chawi lo.

Christensen hian season hman zawh takah khan Blues tan match 34 khelin goal hnih a khung a, assist vawi khat a nei. Mahse, a hma hun atana chona thar hmachhawn turin Stamford Bridge a chhuahsan a, Nou Camp a pan ta - a duh tan £430mtd in Catalan club aṭang hian a leichhuah theih ang.