Asian title chuh turin Mizo boxer an sawm

Thai boxer laka an chak hnuah The Fighter world boxing show huaihawttu TL Promotions chuan, an hnuaia Asian title chuh turin Vanlalawmpuia leh F Zoramchhana an sawm.

LPS Promotion hnuaia feh chhuak Mizo team coach Sete Lalchhuanawma chuan, "TL Promotions hian September-ah anmahni hnuaia Asia title chuh turin Awpa leh Zotea hi an sawm nghal a, a lawmawm takzet a ni. Mahse, thu tawp siam nghal theih a nih loh avangin LPS Promotion, Marine Pro Boxing Promotions leh Sete Boxing Academy ten an sawi ho phawt a ngai dawn," a ti.

Kar hmasa khan Spaceplus, Bangkok-ah India number 1 Awpa'n super lightweight huangah round ruk an inhnek chhungin Aekkawee Kaewmanee a awpbet hneh hle a, round tin la vekin unanimous decision-in a chak a, Khuangthing fighter hian nawr tluan zakin judge pathumin 60-54 vekin an chaktir.

Bantamweight-ah Zotea'n WBA Asia flyweight champion ni tawh Yutthana Kaensa-a lakah boxing hmuhnawm leh ṭha tak a lantir tluan a, judge pathumin round tin chaktirin 60-54 vekin unanimous decision-in hnehna a chang a, fiahna pawimawh tak a pal tlang.

Mizo boxer pahnih hi ram pawna an inhnek hmasak ber leh Indian ni lo ram dang mi an tawn vawi khatna ve ve a ni a, round ruk an inhnek chhunga an inlan danin The Fighter show huaitu Thai promoter TL Promotions mit an tlung dun hle a, an dawr zui nghal a ni.

Mizo team hian Aizawl an rawn thleng tawh. Awpa leh Zotea hian senso tumsaka ram pawna fehchhuah theihna kawng hawnsaktu LPS Promotion leh Marine Promotions bakah Sete Boxing Academy coaching staff chungah lawmthu an sawi a, anmahni thlawptu Mizo mipui leh LPS pay-per-view leitute chungah lawmthu an sawi bawk.