Eriksen-a'n Manchester United zawm a remti

Denmark midfielder Christian Eriksen chuan a thu phungin Manchester United zawm tura sawmna chu a pawm a, he thu buatsaih a nih lai hian fel taka contract ziah erawh a la awm lo.

Kum 30 mi midfielder hian Brentford-a a contract a hmang zo tawh a, a duh lam club pan turin zalenna a nei. Brentford pawh hian châm zui turin thlem mah se Old Trafford lam pan a thlang ta zawk.

Eriksen hian United-ah hian kum thum chhung atan contract a ziak dawn niin an sawi a, Old Trafford-a medical a neih zawh veleh United player ni turin contract a ziak zui ang - he thuziak i chhiar meuh chuan an inlalut fel tawh hial mai thei.

Denmark international hian Euro 2020-ah khan lung lam fel lo avangin harsatna a tawk a, group stage match-a Finland nen an inkhelh ṭumin minute 42-naah khelmualah a tlu.

Eriksen hi a hnuah harh chhuak leh mah se a lung hnathawh pui turin a taksaah Implantable Cardioverter Defibrillator (ICD) phum a ni a, Serie A-ah ICD hmang tan inkhelh theih a nih loh avangin a club khelhna Inter Milan chuan a contract an titawp zui.

Premier League club Brentford chuan January khan Eriksen hi an lalut zui a, a hriselna dinhmun avangin thla ruk bak contract an ziahpui ngam bik lo.

Eriksen-a'n a thiam a lo la theihnghilh lo a, Brentford tan match 11 a khelhah goal khat khungin assist vawi li a nei a, Brentford pawhin chelh zui ngei an duh.

Mahse, a club hlui Tottenham Hotspur pawhin an duh nia sawi Eriksen-a'n United tana khelh a thlang zawk a, season tharah Red Devils jersey nen kan hmu ngei dawn niin a lang.

United hian dutch left back Tyrrell Malacia chu Feyenoord aṭangin pound maktaduai 13-in an lalut tawh bawk a, kum li chhung atan contract ziahpuiin, kum khat dang pawhsei theih a ni. Malacia agent hi United-in a thuphunga inremna an neihpui tawh, Barcelona midfielder Frenkie De Jong-a agent tho a ni a, Erik ten Hag hnuaia intuaithar tum United fan-ten transfer bazar-ah thawm duhawm hriat tur an nei ṭan.