AFCON khelh hun an sawn

Africa khawmualpuia football hmanga ram leh ram inelna ngaihhlut hlawh ber Africa Cup of Nations 2023 chu kum 2024-a khelh turin sawn a ni a, a hun pawh June-July inkara neih tur chu January-February a neih tur a ni dawn.

AFCON hi Ivory Coast-in a thlen tura tih a ni a, ruahmanna hmasa ang chuan June-July inkara khelh tur a ni. Mahse, hetihlai hi Ivory Coast-a ruahtui tlak tam vanglai a ni a, a kum mai bakah a khelh hun tur thla thlengin an sawn ta a ni.

African football-a thuneitu sang ber Confederation of African Football (CAFC) president Patrice Motsepe chuan, "Risk kan la ngam lo a ni," a ti a, "European club-te avangin January-a khelh hi pumpelh hram kan duh a, mahse, kan duhthlan theih awmchhun a ni," a ti.

Kum 2017 khan CAF chuan January-February inkara AFCON an khelh ṭhin chu June-July inkara khelh turin an lo sawn tawh a, hei hi European season nena buaina awm ṭhin a awm loh nana tih a ni.

CAF president hlui Issa Hayatou kha kum laihawla AFCON khelh duh lotu a ni a, mahse, kum 2017-a amah thlaktu Ahmad chuan a thawhpuite nen kum laihawlah an sawn.

AFCON 2019 kha June-July inkarah khelh a ni a, mahse, 2021 chu 2022-ah sawn niin, January - February-ah bawk khelh a ni a, tunah January-February-a khelh turin sawn a ni leh ta.

CAF secretary-general Veron Mosengo-Omba chuan AFCON hi January-February-a sawn hlen tumna a awm loh thu a sawi a, hetihrual hian CAF chuan African Super League an kalpui tur thu an sawi bawk.

ASL-ah hian dollar maktaduai 100 vel sen ral a ni dawn a, CAF president Motsepe chuan champion team-in dollar maktaduai 10 vel an dawn tur thu a sawi - Motsepe chuan African Champions League an tihtawp phah loh tur thu a sawi a, an kal zel dan tur hi hriat a châkawm hle.

African Champions League hi season thar aṭang chuan final chu double leg-a khelh turin an rel bawk - season hman zawh takah khan Wydad Casablanca chuan 2-0 a Al Ahly hnehin an champion a, Egyptian club Al Ahly hi an lungawi lo hle.

Final khelhna hmun hi Moroccan club Stade Mohammed V khelmual a ni a, hei hi Al Ahly lungawi loh chhan ber niin, CAF chuan season thar aṭang chuan double leg-a khelh turin an rel ta a ni.