Ronaldo-a'n club training a zawm lo!

Manchester United thuneitute hnena chhuah a duh thu sawitu Cristiano Ronaldo chuan club training a zawm lo a, United training a zawm loh chhan hi chhungkaw thil vang a nih thu a sawi.

Ronaldo chhuanlam hi United lam chuan an pawmsak a, fan-ten an pawm ve kher em? tih erawh zawhna awm thei a ni - United player-te chuan Thawhṭanni khan pre-season tour atan training an ṭan a, Ronaldo a tel lo.

Season hmasa ṭan dawn khan United fan-te chuan an kut phar chhuak chungin Ronaldo an lo lawm a, fapa tlanbo kir leh ta ang maiah an ngai a, ropuina rama hruai kir turin an beisei.

Mahse, season a tawp meuh chuan nomawi chawi an nei lo a, Champions League an khel dawn lo bawk. Kum 37 mi Ronaldo-a'n a career tawp lama Europa League khelh a duh lo a, United chhuahsan a dil.

A chiang lo
United hian Zirtawpniah England chhuahsanin Bangkok, Thailand an pan dawn a, pre-season tour an ṭan dawn - mahse, he thu buatsaih a nih thleng hian Ronaldo tel theih dawn leh dawn loh United hruaitute pawhin an hre lo!

Red Devils hian Bangkok zawhah Melbourne, Australia an pan leh dawn bawk a, ram pahnih an tlawhah hian Liverpool, Crystal Palace, Melbourne City leh Aston Villa te nen friendly match an khel dawn.

Ronaldo en châk fans tam tak an awm dawn a, hei hi sponsor ho sum insen huai chhan pawh a ni. Chutihrual chuan club hian an tour-ah an player pawimawh ho an hruai loh chuan sum lamah hrem theih an ni.

Cristiano hian United hi a zawm vat a nih loh chuan, sum mai ni lo, coach thar Erik ten Hag-a'n season thar atana ruahmanna a siam turah buaina a thlen thei dawn.

A pawi zo ta
United coach lailawk Ralf Rangnick khan Ronaldo hi hralh a lo duh daih tawh - German coach hian Red Devils hi pressing game khelhpui a duh a, mahse, he system-a 'fit' lo Ronaldo chuan Rangnick ruahmanna hi a pawm lo.

Rangnick hian United football director John Murtough leh chief executive officer Richard Arnold hnenah vawi khat aia tam Ronaldo hralh a duh thu a sawi a, danglamna thlen theih a nih laiin thlasik transfer-a chhuahtir kha a duh.

Mahse, Murtough leh Arnold ten Rangnick-a thusawi an pawm duh lo a, season thar ṭan a hnaih meuh chuan Ronaldo zawkin chhuah a dil ta. Portuguese forward hi Chelsea, Bayern Munich leh Napoli ten an duh nia sawi a ni.

Chutihrual chuan Chelsea neitu thar Todd Boehly-a'n Ronaldo duh viau mah se manager Thomas Tuchel hian lakluh loh pawh a pawi ti lo nia sawi a ni a, Ronaldo dinhmun zel tur sawithiam a harsa hle.

Hlawh tihhniam duh lo!
Ronaldo hian kar khatah £500,000 chuang a hlawh a, Premier League-ah ani aia player hlawh hnem an awm lo. Mahse, United player-te contract-ah Champions League an khelh phak loh chuan an hlawh tihhniam theihna dan a inziak vek.

Contract-a a lan dan chuan an hlawh tihhniam theihna hi 25% vel a ni a, Ronaldo hi a hlawh tihhniam ni ta se kar khatah £375,000 vel a hlawh dawn tihna a ni a, Premier League-a hlawh hnem pawl a la ni dawn tho.

Mahse, Ronaldo hian Champions League khelh dawn loh piahlamah hlawh tihhniam hi a duh dawn lo nia sawi a awm a, zawhna awm erawh, chhuak ta se, United-a a hlawh zat ang pe ngam an awm ang em, tih a ni.

United hian nipui transfer-ah Paul Pogba, Nemanja Matic, Edinson Cavani, Juan Mata leh Jesse Lingard an chhuahtir tawh a, player an chhuah tam tir ngaihtuaha transfer bazar-a an che muang chu Ronaldo hian a duh lo nia sawi a awm bawk - thuthang lengvel a awm nual a, chung zinga huaisen taka ziah ngam chu, "Ronaldo-a'n chhuah a duh," tih hi a ni tlat!