Halep tan buaina a awm lo

Simona Halep chu Centre Court kum 100 tlin lawmnaah a inlan a, Wimbledon champion ni tawh ho zingah Pathianni zan khan hun a hmang - a tan hun hlimawm leh chhinchhiah tlak a ni ngei ang.

Thawhṭanni zan khan Centre Court-ah hian last 16 match a khel zui, darkar khat chhung lekin Paula Badosa chu 6-1, 6-2 in a hneh. Zaninah Amanda Anisimova nen semifinal luh inchuhin an inkhel leh nghal dawn.

Kum 2019 Wimbledon champion Halep hian All England Club-a match a khelh hnuhnung 11-ah hnehna a chang vek, a tan chuan grass court inelna lian hi hmun nuam a ni a, chak chhunzawm zel pawh a tum ngei ang.

World number 1 hlui Halep hi hliam vangin season hmasa khan a inkhel tam lo, a ranking a hniam avangin tun ṭumah pawh hian seeded 16-na a ni phak hram. Mahse, tun ṭumah pawh seeded palina hneh turin theihna a la nei sang ve tawk tih a lantir.

Halep hian 2019 khan Wimbledon title hi a la, 2010 khan hripui leng vangin tournament hi khelh a ni lo zui. Season hmasa khan hliam vangin inelna a hmachhawn thei lo, a champion aṭanga kum hnih a liam hnuah Wimbledon a khel ve leh chauh tihna a ni.

Kum 30 mi Halep chuan, "Ka tan chuan Centre Court hi a hlu. Player ṭha leh ropui tak tak pawh ka lo hneh ve tawhna ṭhin a ni. Badosa pawh kha hmachawn a awlsam lo, kan result en chuan a awlsam hmel pawh a ni mai thei.

"Mahse, inkhel awlsam a ni lem lo tih chu a entuten an hria ang, point khat hmu tur pawhin thawhrim a ngai ṭhin hle," tiin a sawi. A hmachhawn leh tur Amanda Anisimova hian inkhel dangah Harmony Tan chu 6-2, 6-3 in a hneh ve thung.