Anfield-ah Lovren cham a rinawm

Liverpool defender Dejan Lovren chu a puanthuah tela chhuak mai tur angin sawi thawm awm reng mah se Anfield-ah a la cham zel dawn niin a lang a, Reds chuan an defender hi kum khat dang atan chelh an tum. 

Russian club lar Zenit St Petersburg chuan Lovren hi an duh nia sawi a ni a, mahse he thu buatsaih thleng hian official taka Liverpool dawrna erawh an la nei lo. Kum 31 mi defender hian July 2014 khan Southampton aṭangin Reds hi pound maktaduai 20-in a zawm a, April 2017 khan kum 2021 nipui thleng cham turin contract thar a ziak.

Lovren-a contract-ah hian a ṭul dan anga kum khat dang pawhsei theihna dan a awm a, Reds chuan tun nipui transfer chhunga an hralh hman lo a nih chuan kum khat dang a contract hi pawhsei an duh a ni - season tharah a thlawna chhuahtir mai loa manto zawka hralh theih an inbeisei vang niin a lang. 

Croatia international hian tun season Premier League-ah match 10 a khel a, hliamin a tihbuai ve bawk avangin inelna hrang hrangah match 15 chiah a la khel - goal khat a khung. Tun season ṭan dawn khan bench-a hun hman tam a duh loh avangin chhuah a dil a, AC Milan leh AS Roma ten lakluh duh mah se chhuak loin Anfield-ah bawk a cham chhunzawm.