Zemabawk derby a 'hot'; Ramhlun S an tla!

LBS Suzuki All Mizoram Inter Village Football Tournament-ah team an inthlifim zel a, inkhel a hmuhnawm tawlh tawlh - nimin inkhelah Zemabawk derby chu boruak 'hot' bera chhal ngam a ni a, Lengpuiah inkhel entu mipui pawh an ṭhahnem hle.

Zemabawk LC lakah Zemabawk North chu chak zawk tura beisei ni mah se beisei angin thil a thleng lo a, squad chhah ṭha zawk Zemabawk North hi 4-3 in an tlawm - round of 32 an lut zo ta lo.

Nimin inkhel ngaihven hlawh dangah Khawzawl Vengthar leh Ramhlun South te hun pangngaiah goal khung loin an inhnehtawk a, penalty shootout-ah 8-7 in Khawzawl Vengthar VC an chak daih!

Durtlang pet thlatu Thenzawl West-in vanneih vanga thleng sang an ni lo tih an pholang a, team ṭha College Veng LC chu 1-0 in an pet chhuak - Salem Veng LC-in beiseina sang tak neitu Hualngohmun VC chu 2-1 in an hneh bawk.

Zemabawk derby
Lengpui MSC-ah Zemabawk derby en turin fans ṭhahnem tak an pungkhawm a, veng pahnih mipuiten Thawhṭanni zan kha chuan social media-ah pawh an veng inkhel tur lo chu sawi tur an hre meuh lo.

Zemabawk North-in 'star' an ngah zawk a, I League-a goal khung thei naupang ber pawh lo ni tawh Samuel Lalmuanpuia chuan minute lina lekah an veng mipui lawmna thlenin goal hmahruai a khung.

Samuel-a leh Ricky Lalnuntluanga hmangin North lam hian vawi hnih hma hruai mah se Fredy Lalrinchhana goal hnih hmangin Zemabawkin an sut - minute 48-naah H. Malsawmkima hmangin hma an hruai zui a, Samuel-a'n si phurh sut ve leh mah se Malsawmdawngkima'n freekick mawi bik a khung leh a, Zemabawk an chak.

North lamin David Lalrinmuana chu bench aṭangin luhtir mah se Mizo midfielder thiam bik hian danglamna a thlen thei bik lo a, Samuela'n bar a tauh perte chu a ui vawng vawng ang.

Ramhlun S an tla
Khawzawl Vengthar player Lalṭhakima leh Solomon Lalramsiama te hnawhchhuah ni mah se, Malsawmfela te unau kawltu Ramhlun South-in anni aia team tenau zawk lakah goal an khung thei chuang lo a, an tlawm.

Ramhlun S hian Sawmfela, Lalnunmawia leh Vanlalthlamuana te unau bakah Chennaiyin FC defender hlui Zohmingliana Ralte an kawl a, chutihrualin an player dang erawh naupang tê tê an awm nual. Khawzawl Vengthar hian Aizawl FC defender Lalṭhakima bakah MPL tem tawh player an kawl ve nual a, result mak tak anga lang hi player en chuan a mak vak lo ve thei.

Mahse, football mawina phochhuahin a awm. Goal hmaah Ramhlun S an vanduai a, 0-0 a hun pangngai a tawp hnuin, penalty-ah 8-7 in Khawzawl Vengthar an chak zui a, champion beisei team tawpna chu round of 64 a ni.

Hetihlai hian Salem Veng chuan MPL-a khel thei player panga kawltu Hualngohmun chu 2-1 in an hneh a, David Lalchhuanawma'n goal hnih a khung. Salem hian David bakah local football-a mikhual lo Joseph Lalnunpuia, MPL Under 18 neih zawh taka best player Laldanmawia, best forward Lalnunzira Sailo leh best goalkeeper Joel B. Lalramchhana te an kawl.

Hriat reng tur Thenzawl W
Thenzawl West-in Jeje Lalpekhlua enkawl, ISL leh I League player rual kawltu Durtlang an pet chhuak a, inkhelh zawhah thla an lakpui zui - Thenzawl W hian kha inkhel kha an tihpalh a ni lo tih an lantir zui.

Nimin inkhelah Thenzawl hian team ṭha pangngai tak College Veng LC chu 1-0 in an hneh a, Lalromawia chuan inkhela goal awmchhun hi a khung - Electric Veng FC coach hlui Ramlalthlamuanpuia (Sabito) nauten inelna an mangṭha.

Lammuala Tanhril leh Jt.VC Lawngtlai inkhelah red card pahnih phawrh a ni a, a tawpah 4-2 in Tanhril an chak. Hnahthial Jt. VC-in 10-1 in Darlawng VC an hneh a, FC Pune City lamah pawh hun lo hmang tawh Jakob Vanlalhlimpuia chuan goal hnih a khung.

Ṭumpui VC-in Kolasib hming an tiṭha zel a, Mizo striker lar William Lalnunfela kawltu team hian Dawrpui Vengthar chu penalty-ah an hneh. Team pahnih hi hun pangngaiah 1-1 in an inhnehtawk a, mahse, penalty-ah 4-3 a Ṭumpui an chak avangin hun pek belh minute linaa DVT tana Sairuatkima goal khung chu engmah lo mai an chang.

July ni 5, Thawhlehni Results
Round of 128
Khelmual - RG Stadium, Mualpui
Kelsih VC 1 - 4 Tuithiang LC
KEL: K. Lalhmangaihkima 69'
TUI: M. Lalpektluanga 7', 21', 56'; Thasiam 43'
Chanmari West LC 1 - 2 Bilkhawthlir North VC
CHA: H. Lalrinmawia 4'
BIL: C. Lalnunpuia 23'; Lalremsanga 64'
College Veng LC 0 - 1 Thenzawl West VC
THE: Lalromawia 68'
Model Veng LC 0 - 2 Saron Veng LC
SAR: Zoramsanga 26'; B Lalrindika 49'

Khelmual - MFA Ground
Zawlnuam Bawrai VC 1 - 3 Thiltlang VC
ZAW: Lalhruaitluanga 44'
THI: Jordy TC Lalramchhuana 11'; CVL. Hmangaihzuala 88', 89'
Darlak VC 2 - 5 Farkawm VC
DAR: Remruatpuia 62'; C. Lalthlemgliana 89'
FAR: Ramnunsanga 7'; C. Vanlalchhana 39'; C. Ramnunpuia 46', 73'; K. Lalrinpuia 64'
Hualngohmun VC 1 - 2 Salem Veng LC
HUA: Lalramtharmawia 11' (P)
SAL: David Lalchhuanaa 28', 63'
Venghlui LC 2 - 2 Chanmari LC
VEN: Varun Tamang 21'; K. Roluahpuia 72'
CHA: Jerry Mawia 52'; Reuben Vanlalhriatzuala 62'
(Penalty shootout-ah Venghlui LC 4-3 in an chak)

Khelmual - AR Lammual
Tanhril LC 4 - 2 Jt. VC Lawngtlai
TAN: Lalrinchhana 6'; Lalbiaknia 10', 31'; Lalrinnunga 90+3'
LAW: Joel Lalrinkima 30'; A. Lalhruaitluanga 54'
Darlawng VC 1 - 10 Hnahthial Jt. VC
DAR: Lalrintluanga 52'
HNA: Jeremy Laldinpuia 17', 90'; Lalrintluanga 21', (P), 45'; Jakob Vanlalhlimpuia 29', 43'; Joseph Vanlalhruaia 67', 83'; Lalsawmliana 76' (P); PC Rosangzuala 86'
Khawzawl Vengthar VC 0 - 0 Ramhlun South LC
(Penalty shootout-ah Khawzawl Vengthar 8-7 in an chak)
Reiek VC 1 - 1 Sairang Dinthar VC
REI: Lalsangkima 21' (OG)
SAI: Lalmuanpuia 72'
(Penalty Shootout-ah Reiek VC Team 3-2 in an chak)

Khelmual - Lengpui MSC
Lungdai VC 4 - 0 Hriphaw VC
LUN: Paul Ramengmawia 10', 72'; Moses Vanlalduhsaka 57'; Lalhriathlua 88')
Ṭumpui VC, Kolasib 1 - 1 Dawrpui Vengthar LC
ṬUM: Vanrammawia Ngente 18'
DAW: Sairuatkima 90+4'
(Penalty shootout-ah Ṭumpui 4-3 in an chak)
Zemabawk LC 4-3 Zemabawk North LC
ZEM: Fredy Lalrinchhana 22', 46' H Malsawmdawngkima 48', 78'
ZMN: Samuel Lalmuanpuia 4', 67'; Ricky Lalnuntluanga 38'
Republic Veng LC 0 - 0 Champhai Zotlang VC
(Penalty shootout-ah Republic LC 4-2 in an chak)