Lenchim inlan a hun leh ta

Mi tam tak chuan Lenchim awmna an hre lo mai thei, tualchhung football ngainatute erawh chuan LBS Suzuki Inter Village Tournament aṭang hian Lenchim awmna an zawng a, an hre fur tawh ngei ang.

Saitual district chhunga khaw pakhat, chenna in 76 (2011 census) chauh awmna, mihring pawh 338 chauh an ni, mahse he khua hian football khelhna tur khelmual an nei a, chumi rahchhuah chu Aizawl khawpuiah a lang mek.

Lenchim hian an match hmasa berah Chaltlang Lily Veng an hneh a, an tih fuh palh niah an ngai. An match hnihnaah Aizawl Venglai hmachhawnin goal thum an phur hmasa, hun tawp dawnah sut zo vekin penalty-ah an chak leh daih.

Vawiin chawhnu dar 2:00 hian RG Stadium, Mualpuiah Lenchim hian Khawlailung VC an hmachhawn dawn, an inkhel tawk viau tura ngaih a ni.