Tum tih san a ngai - Jose Mourinho

Jose Mourinho chuan Tottenham chu tum sang tak nei turin a duh a, an hmelma leh elpui ni bawk Arsenal chunga season khar chauh duhtawk loin hlawhtlinna lamtluang zawh chu an thil tum a nih tur thu a sawi.

Season 21 chhung chu Gunners hnuaia awm chungin Spurs-in season an khar ṭhin. Tun hnai season thum chhung erawh a chung zawkah an awm, league match khelh hambak pathum an la neihah pawh a chung zawkah an awm mek.

Mourinho chuan, "Fans tan chuan Arsenal chunga awm hi a hlimawm turzia leh an lawmna san turzia ka hria, mahse kei chuan a aia sang ka duh," a ti. Spurs hi nomawi chawipui ngei a tum thu a lo sawi tawh bawk a ni. Pariatna Tottenham tan Europa League beiseina a la nung reng a, zanin dar 10:00-a Newcastle United an lenchilh hunah pawh hnehna chan ngei an tum ang. Spurs (52 points) hi an chunga awm Sheffield United (54) leh Wolves (55) te nen inlehthal thei reng an la ni.

Portuguese manager chuan, "Europa League hi ka inelna ngainat tak a ni lo. Mahse Champions League kan khel thei lo a nih chuan kan khelh a ngai si, hmasawn duh mah ila thlen chinah lungawi a ngaih chang a awm. "Team ka enkawl chinah Europe League hi vawi hnih ka khel tawh a, ka champion ve ve. A vawi thum nana khelh a, vawi thum nana champion bawk chu a ṭha viau tho ang," tiin Europe football inelna sang pahnihna an khel a nih pawhin nomawi chawi an tum tur thu a sawi der tawh.