Sane-a'n training a zawm

Leroy Sane chuan Thawhṭanni khan Bayern Munich a zawm hnua a training ni hmasa ber a hmang a, German champion tana a khel thei tur chu a hlim thu a sawi chhuak.

Manchester City forward hlui Sane hi tun season khelh ṭan hma khan a hliam, hliam vang hian a inlan lo rei hle - Covid-19 vanga chawlh lailawk a awm avangin season tawp lamah erawh a inkel thei leh hman. German international hian Man City tana a contract a pawtsei duh lo a, an rama inkhelh a duh bakah Bayern Munich-in lakluh an duh avangin a tan khaw dang hawi theih a ni lo a, chona thar a hmachhawn dawn.

Kum 24 mi Sane chuan, "A boruak a nuam hle, player ṭhenkhat nen training kan nei thei. Hetianga hlimna hi hun rei tak chhung ka neih theih tawh loh kha a ni a, tunah chuan hlimna tak a lo thleng leh ta," a ti. Bayern hian season tharah an jersey number 10 chu Sane tan an dah thu an ti chiang tawh, tuna ha mektu Philippe Coutinho dinhmun chian loh zia ti langtu a ni thei ang. Barcelona aṭanga loan hmanga an hawh lai lai hi manager Hans-Dieter Flick hnuaiah a khel phak meuh lo.

Sane-a'n Bayern zawm fel tawh mah se Champions League-ah erawh an la chhawr thei dawn lo. German champion hian UCL last 16-ah Chelsea chu 3-0 in an luhchhuah tawh a, second leg khelh hmabak la nei mah se quarterfinal chu an lut chiang tura ngaih a ni.