Inter Milan chak nuamsa

Thawhṭanni zan khan Serie A inkhelah Inter Milan chuan an mikhual Torino chu 3-1 in an hneh a, point 68 hmuin pahnihna dinhmun an luah. Ningani zanah a hniam bera awm SPAL nen an inhmachhawn leh ang.

Mikhual Torino lamin minute 17-naah Andrea Belotti hmangin goal hmahruai an khung a, chawlhlawk laiin Antonio Conte naute 1-0 in an hnufual; an mualah mualpho mai thei dinhmunah an ding tihna a ni. Inkhel chawhnu lamah erawh Inter an chungnung. Ashley Young-a'n si phurh a sut hnuin Diego Godin chuan an hmahruaina a tauh lut, season hmang ṭha tak striker Lautaro Martinez chuan chak nemnghehna leh an goal thumna ni bawk a khung ve thung.

Tun hnaiah match hnih chhung chak ni hmel an hmuh loh hnuah Inter an chak leh ta a, manager Conte chuan a naute khelh danah a lungawi thu a sawi. Italian manager chuan, "Bul kan ṭan fuh a, tihsual pakhat kan neih avangin kan chan a chhe hmasa.

"Goal kan phurh hnuah erawh engkim kan siamṭha, ka naute khan point thum hlawh chhuak tur khawpin an khel ṭha a ni," a ti. Juventus an phak lohna chu point riat a ni a, khelh hmabak match paruk an la nei.

Champion lai Juventus chu zanin dar 1:15 hian Sassuolo mualah an lenglut dawn. Sassuolo hi season thara European football khelh la beisei lai an ni a, fimkhur loh chuan point hloh theihna tur a ni ang.

Amaherawhchu, Old Lady tan Cristiano Ronaldo-a'n goal khung a la bansan thei lo a, forward Paulo Dybala nen an inkawp rem em avangin Turin club hian hnehna an chan chu a rinawm - a zawna a vawi kua nan Serie A champion nih leh an tum mek. Juve manager Maurizio Sarri chuan Ronaldo chungah rinna a nghat sang hle. Sarri chuan, "A taksa chauh hi hlawhtling tura ṭha tawk a ni lo, a rilru put hmang engkim mai pawh hi a dik vek a ni. Boruak sang hmachhawn dan a thiam em em bawk a ni.

"Ronaldo kan nei hi kan vannei hle, ani a awm hi chuan kawng a awlsam ṭhin. A kum a tam thu hi mi sawi ka hre ṭhin a, khelmual chhungah erawh tleirawl thaza rual ang maiin a la tal thei," tiin Portuguese forward chu an innghahna a nih thu a sawi.