PasalṬha ram chhuak nomawi nen an rawn haw

Vawiin tlai khan Lammualah Mizoram Football Association buatsaihin I League champion Aizawl FC hmuahna hun buatsaih a ni.

India champion hmuaktu Mizo mipui an tam takzet a, Lengpui aṭanga Lammual thlengin mipui ṭhahnem tak kawng sira an din bakah Lammual khat tlatin mipui an pungkhawm bawk.

MFA honorary secterary Lalnghinglova Hmar chuan, "Pathian chu fakin awm rawh se. I League-ah kan champion a ni. India rama state leh state football hmanga inelna sang ber Santosh Trophy-ah kum 2014 khan kan champion tawh a, 2015 khan National Games-ah kan champion leh a, tunah hian football club-te inelna sang ber I League-ah kan champion leh ta a ni," tiin Mizoram hlawhtlinna chu chhuang takin a sawi.

Tetea Hmar chuan Mizoram hlawhtlinna chu thingtlang kilkhawr bera football hruaitute, Zone hruaitute, District FA hruaitute, MFA hruaitute, club enkawltute, sum thawhtute leh mipui an nih thu a sawi a lang a, Mizoramin nomawi kan chawi zel loh chuan tihfuh anga ngaih kan nih theih avangin football hmangaihtute chu ṭangzel turin a fuih bawk.

Aizawl FC neitu Robert Romawia Royte chuan, "Season liam taah India dan mak tak hmangin tla tura ngaih kan ni. AIFF duhsakna dawngin I League-ah min telh a, chak zawkin kan rawn let ang tiin kan intiam a, Khalid-a hoa ka thutiam min tih hlawhtlinsak hi ka lawm hle a ni," tiin a sawi a. Robert chuan team tan nuai 25 a pek thu a puang.

India champion hmuahna hunah hian football club, association hrang hrang leh mi inphal ten thilpek hlanna hun an nei bawk.