Ka ram a ni, ka ram ngei an champion a ni - Jeje
Mizo footballer zinga thleng sang ber Jeje Lalpekhlua chuan 'Ka ram a ni, ka ram ngei an champion a ni' tiin Aizawl FC a lawmpui thu a official facebook page-ah a ziak.
Mohun Bagan-in I League match hnuhnung ber thlengin champion beiseina nung an nei a, Mizo tlangval Jeje hian infiammi rilru pu chungin Kolkata club tan theihtawp chhuah mah se hnehna an chan zawh loh hnuah mi puitling a nihzia a pholang.
I League tawp zan chungchang sawiin Jeje chuan, "Shillong Lajong-in goal an khung tih kan hriat khan kan fan-te ho kha an au rual dual dual a, an phusa nasa khawp mai. Theihtawp chhuahin Chennai City kan hneh a, amaherawhchu AFC leh Lajong an in draw avangin tih theih kan nei lo. Kan champion loh dan hi a uiawm hle a ni," tiin Vanglaini a hrilh.
Mizo club a lawmpui thu sawi chhunzawmin, "Nomawi chawi lo mah ila India ram champion hi Aizawl FC an ni. Tun season-a nomawi chawi phu ber chu AFC an ni a, Mizo club hi ka lawmpui a ni. Player-te, coaching staff leh management te ka lawm pui khawp mai. A bik takin Mizo mipui te ka lawmpui a, Mohun Bagan-a ka khelhpuite pawhin Aizawl FC hi chu an lawmpui a ni," tiin India striker Jeje chuan club dang champion nen a inang loh thu a sawi.
A official facebook page-a Jeje-a thukhawchang chu
Zan hrehawm leh harsa tak ni mah se hriatreng tlak erawh a ni lawi si. Mohun Bagan tan tun season-a ka khel thei hi ka lawmin ka hlim takzet a, point khat leka hniam zawk nichunga kan ban phak maia mi nomawi kan hloh erawh ka ui a ni. Nomawi kan chawi loh avangin hnual mah ila Aizawl FC erawh an champion avangin ka lawmpui takzet. Kum tam tak chhunga thlan tui luang, mittui leh thawhrimna te kha tunah chuan thil hlu ber an chang ta. Mizoram mipuite chiahin vawiin hlawhtlinna nei tura kan beihna hi an hrethiamin ka ring a ni. Lammuala khelmual diak tak kar aṭangin vawiinah chuan champion khelmualah kan inlan ta.
Lungphum pawimawh tak kan phum a, thawnthu hlui zingah hriatreng a ni tawh ang. Zanin zet chu hun tam tak liam ta kha ka thlir kir a, keimah leh keimah hi zawhna ka inpe a, "I League champion i hria em?" tiin.... Mizorama khelmual ni sen sa hnuaia vaivut kara tal ṭhin, naupang chuan, "Ka ram a ni, ka ram ngei an champion a ni," tiin ka inhrilh a.