AFC lawmpuitu Isaac leh Samuel

Aizawl FC-in an match hnuhnung berah Shilong Lajong an hmachhawn a, Mizo club kawng daltu zingah hian Mizo tlangval pahnih Isaac Vanmalsawma leh Samuel Lalmuanpuia te chu inkhel bul ṭantu niin inkhelh banah Mizo club an lawmpui thu Vanglaini an hrilh.

Hnahthial tlangval Isaac chuan, "Ka thinlung takin ka lawm a, nakin zela Mizoin hriat tur kan nei ta hi ka lawm takzet a ni. Player-te, coaching staff-te leh India ram puma Aizawl FC fan-te ṭawng-ṭaina rah kan seng hi ka lawm hle a ni. An kal leh zelna turah duhsakna ka hlan bawk e," tiin a sawi.

Season liam taa Aizawl FC lama goal khungtu Samuel-a'n tun season-ah goal khung tawh lo mah se khelmual chhungah theihtawp a chhuah a, inkhelh banah erawh AFC champion vangin a lawm thung.

Zemabawk North tlangval Samuel-a chuan, "Hetianga kan ram ngei aṭanga I League nomawi chawi thei club an awm hi a lawmawm takzet a ni. Pathian hnathawh a lang nasa hlein ka hria. A tute pawh an thawkrim em em vek a,an phu a ni. Fan-ten khawi hmunah pawh kal se an ṭawiawm ṭha thei em em a, Aizawl FC fans zawng zawngte hian fak an phuin player te tluk zeta pawimawh an ni tih an lantir nasa a, a lawmawm hle a ni. Fan zawng zawng bakah players, coaching staff leh AFC chhungkua, a bikin pu Robert-a ka thinlung takin ka lawmpui tak zet zet a ni. Aizawl FC hi Mizoram tihmingṭhatu an nih chhunzawm zel ka beisei bawk," tiin Mizo club a lawmpui thu a sawi.

Lajong-a Mizo player pahnih hian inkhel entu mipui chu an beisei aia tam a nih thu an sawi ve ve a, Mizo mipui nawlpuiin football an tui tih an hriatin tun hma ai zawnga football khelh a phurawm an tih thu Vanglaini palai an hrilh bawk.