Zanin dar 12:15-ah Madrid Derby

UEFA Champions League champion lai Real Madrid-in zanin dar 12:15 hian Santiago Bernabeu-ah an hmelma Atletico Madrid can mikhual dawn a, semifinal first leg hi Ten 2-ah pekchhuah a ni ang.

Real an chungnung

Real Madrid hian European competition-a Atletico Madrid an hmachhawn ṭumin dinhmun ṭha zawkah an ding vek a, inkhelh tawhna aṭanga thlir chuan Diego Simeone hote hi chak lo tur an ni.

Real Madrid hian 1959 Euro­pean Cup semifinal, 2014 Cham­pions League final, 2015 UCL quarterfinal leh 2016 UCL final-ah Atletico hi an hneh tawh.

Hemi ṭum hian Zinedine Zidane chuan, "Tun hun hi ka suangtuah tawh ṭhin. Player, assistant-te leh head coach anga Champions League nomawi ka chawi thei hi ka lawm a ni," tiin a lawm thu a sawi. Chak lo zawk manager Simeone chuan, "Kan rilru natna theihngilh turin hun rei tak kan mamawh dawn a, tunah chuan ina haw a, kan rilru hliam thawi dam a ṭul a ni," tiin inkhelh banah a sawi thung.

Atletico hun?

Argentine coach Diego Si­meone hnuaiah Atletico Madrid-in result nei ṭha mah se Champions League nomawi an la chawi thei lo. Tun ṭumah erawh La Liga lama an result ṭhat tawk loh avangin Champions League chauh an thlir thei tawh a, hei vang hian Zidane-a naute tan Atletico hi tawh an khirh sawt ang.

Real hian La Liga-ah Cham­pions League aṭanga tla tawh Barcelona an elpui a, Los Blan­cos hian match khata khel tlemin Catalan club nen point 81 ve ve an hmu tawh. Spanish league lamah pressure a sang tih a lanna chu kartawp khan Real Madrid hian harsa takin Valencia 2-1 in an mualah an hneh hram a, Atletico erawhin khualmualah Las Palmas 5 - 0 in an sawp.

Ronaldo vs Griezmann

Madrid Derby-a player lang­sar tur chu Cristiano Ronaldo leh Antoine Griezmann te an ni.

Real forward Ronaldo hian Atletico hi vawi 27 hmachhawn tawhin goal 18 a khung tawh a, Vicente Calderon-ah hattrick vawi hnih a siam tawh bawk. Atletico tan penalty chawi loh a fuh ang, Portugal captain hian goal 18 zinga goal riat hi penalty aṭanga a khung a ni.

Atletico forward Griezmann hian Real Madrid vawi 21 hma­­chhawn tawhin goal nga a khung tawh. Real tana hriat tur pawimawh chu Griezmann-a goal nga hi second half-a lut vek a ni a, French forward hian goal a khung chuan derby match-ah Atletico lamin chak loh an nei lo.

A hmuhnawm dawn

Real Madrid hian semifinal lut turin champion tura rinkai zinga mi Bayern Munich an hneh thei. A sang pali zinga inhlangkai turin Atletico-in Europe-a Leicester City beiseina an titawp thung.

Atletico-in Champions League nomawi an la chawi ve loh laiin Real-in vawi 11 an chawi tawh thung a, khaw khat club ni ve ve sia hnufual zawka ṭan reng Diego Simeone hoten an tum dawn lo.