A vawi khat nan Bottas chak ber
Valtteri Bottas chuan Formula 1 inelna huangah a vawi khat nan hnehna a chang va ta. Pathianni zana tlan zawh tak Russian Grand Prix-ah Mercedes driver hi a tlan chak ber a, a teammate Lewis Hamilton chu palina a ni.
Qualifying lama cheṭha Sebastian Vettel-a'n pole position aṭangin bul a ṭan a, Ferrari driver pakhat zawk chuan pahnihna a ṭangin bul a ṭan thung. Intlansiak ṭan tirh aṭangin pathumna aṭanga tlan ṭan Bottas hi a tlan fuh nghal a, Ferrari driver pahnih tlan pelin hnehna a chang.
World champion vawi li ni tawh Vettel chuan inelna an neih hmain Mercedes an barakhaih tur thu a sawi lawk nachungin pahnihnaah a lungawi a ṭul. Russian GP-ah hian tun hnai kum li chhung chu Mercedes an chungnung ta.
Russia GP-a lap 53 intlansiakah hian Dutch rawlthar Max Verstappen chu pangana a ni a, Force India driver pahnih Sergio Perez leh Esteban Ocon ten an thleng bawk.
Kum 27-a upa Bottas chuan, "Ka nghah chu a lo thleng ve ta. Intlansiak vawi 80 chuang ka hmachhawn tawh a, a hmasa berah ka thleng ngai lo. Tun ṭumah erawh ka lo suangtuah ṭhin kha a takin a thleng dik ta," tiin a sawi.
Tun season Formula 1 intlansiak vawi li awm tawh aṭangin Vettel chuan point 86 hmuin hmahruaitu a ni. Pahnihna Hamilton chuan point 73 a hmu a, an hnungah hian Bottas (63 points) leh Kimi Raikkonen (49) te an awm thung. Intlansiak pangana atan May 14 khian Spanish Grand Prix tlan a ni leh dawn a ni.
RUSSIAN GRAND PRIX RESULTS
1 Valtteri Bottas Fin Mercedes
2 Sebastian Vettel Ger Ferrari
3 Kimi Raikkonen Fin Ferrari
4 Lewis Hamilton Gbr Mercedes
5 Max Verstappen Hol Red Bull
6 Sergio Perez Mex Force India
7 Esteban Ocon Fra Force India
8 Nico Hulkenberg Ger Renault
9 Felipe Massa Bra Williams
10 Carlos Sainz Spa Toro Rosso