Dan theih loh Nadal

Rafael Nadal chuan Dominic Thiem hnehin Barcelona Open nomawi a chawi. Pathianni zan final-ah Nadal hian Austria tlangval lakah 6-4, 6-1 in hnehna a chang - Spain star hi he hmunah hian a vawi 10 champion na a ni.

Kum 30-a upa Nadal hi tun hnaiah dan theih loh ang maia hlauhawm a ni leh tawh. Kar hmasa khan a vawi 10 nan Monte Carlo Masters title a la a, Open Era bika inelna pakhata ṭum 10 champion thei hmasa ber record a siam. Tun karah pawh Nadal hian match nga a khelhah set khat mah a hloh lo.

Nadal hian nomawi chawi turin set khatna game 10-naah Thiem service a chhuhsak a, set hnihnaah a khingpui service hi ṭum hnih a chhuhsak leh bawk. Darkar khat leh a chanve chhungin harsana nei loin hnehna a chang a ni.

Grand Slam vawi 14 champion tawh Nadal chuan, "Ka khelh ṭhat vang chu ni bawk mah se Dominic khan tihsual a nei fo a, ka vanneih phah a ni," tiin a chapo lo hle.

Barcelona Open ṭan hmain inelna buatsaihtu lam chuan an inkhelhna court pui ber chu 'Rafa Nadal court' tiin an thlak sak a, a hming chawina court-ah ngei a champion zui ta a ni.

Kumina Grand Slam tournament pahnihna a tan May 28 aṭangin French Open khelh ṭan a ni leh dawn a, he hmuna nomawi vawi kua ngawt chawi tawh Nadal hian Monte Carlo leh Barcelona ang hian a vawi 10 nan champion leh theihna hun ṭha a nei dawn a ni.