Punjab-in Delhi an sawisa

Pathianni tlai IPL inkhelah Kings XI Punjab chuan an mikhual Delhi Daredevils lakah ṭhat an chhuah duh lo a, wicket 10 ngawtin an sawp.

Mohali khawpuia inkhelah Delhi an bat hmasa zawk a, over 17.1-ah run 67 chiah siamin wicket an hloh vek! Delhi tana run siam hnem ber Corey Anderson pawhin run 18 bak a tlin lo a, Punjab bowler an ngam lo hle.

Kings XI tan Indian bowler Sandeep Sharma a che ṭha fal nalh a, kum 23-a upa bowler hian over li a vawmah run 20 chiah pein wicket li a la thei a ni.

Punjab bat hun a thleng a, an target umpha turin over 7.5 bak an mamawh lo - wicket an hloh miah lo bawk! Kings XI tan hian opener Martin Guptill chuan run 50 a siam a, a dinpui Hashim Amla chuan run 16 a vaw chhuak ve bawk.

Pathianni zan in­khel­ah Sunrisers Hyde­ra­bad chuan table-a hmahruaitu Kolkata Knight Riders chu thlah fal bik an duh lo tih an lantir a, run 48-in an hneh. Sun­risers hian over 20-ah run 209 an siam a, wicket thum chiah an hloh.

Hyderabad tan David Warner chuan run 126 ngawt siamin a che ṭha fal nalh a, KKR bowler-te a chhaih mangang hle. Kolkata club-in hnehna chan ngei tumin theihtawp chhuah mah se run 53 siamtu Robin Uthappa-a'n thlawptu a nei ṭha tawk lo a, over 20-ah run 161 siama wicket sarih hlohin a tlawm zawkah an ṭang ta a ni.

Zanin Inkhel Tur
Delhi Daredevils 08:00 PM Sunrisers Hyderabad