Dutch Cup champion Vitesse
Vitesse Arnhem chuan an club kum 125 chanchina a vawi khat nan nomawi an chawi a, Dutch Cup-ah an champion. Pathianni zan khan AZ Alkmaar chu hun tawp hnaih lama Ricky van Wolfswinkel goal hnih khung hmangin 2-0 in an hneh.
Kum 28-a upa Wolfswinkel hian minute 80-naah an goal hmasa ber a khung a, hun tawp nan minute hnih chiah a awm tawh tihin an goal hnihna a khung leh bawk - Norwich City striker hlui hian tun season-a inelna hrang hrangah goal 21 ngawt a khung tawh.
Vitesse hi Dutch league-ah parukna an ni mek a, Cup-a an champion avang hian season tharah Europa League an khel ang. Vitesse hian Dutch Cup final-ah hian Chelsea aṭanga loan-a an hawh player pathum Brazilian midfielder Nathan, United States defender Matt Miazga leh English midfielder Lewis Baker te chu an khelhtir ṭheuh a, an pathum hian kum 22 hnuai lam vek an ni.
Final-a chak zo lo lam AZ Alkmaar goalkeeper hi Tim Krul a ni thung a, kum 29-a upa keeper hian Newcastle United aṭangin loan-in an ram club-ah hian a khel.