Arsenal chungah Tottenham

Pathianni zan Premier League inkhelah Tottenham Hotspur chuan an mikhual Arsenal 2-0 a hnehin nomawi an beiseina an chhawm nung. Gunners tan erawh seaosan thara Champions League khelh theihna kawng a zim sawt thung.

White Hart Lane-a inkhelah Tottenham hian rawlthar duhawm Dele Alli leh Harry Kane te goal hmangin Gunners hi an hneh. Spurs hi an elpui Arsenal lakah kum 1994-95 hnua a vawi khat nan season tawpah an chungnung zawk dawn tih a chiang ta.

Spurs beiseina

Hmahruaitu Chelsea-in khualmualah Everton 3-0 in an va luhchhuah a, Blues hian point sarihin hma an hruai fal hman. Mahse, North London derby khelh zawh a nih chuan Spurs hian point li chiahin an thlau leh tawh - league match li khelh hmabak an la nei.

Mauricio Pochettino naute hian a zawnin league match vawi kua hnehna an chang tawh a, kum 1960-a vawi 13 zet an chak zawn tih lohah chuan an chak tluan rei ber ṭum an tawng mek.

Tottenham manager Pochet­tino chuan, "Kum 22 hnua Arse­nal chunga awm chung ngei a season kan khar tur hi kan fans tan a hlu hle ang, kan tan pawh a lawmawmna a nep chuang lo. A hluin a ropui a, chutih rualin kan duh ber erawh nomawi a ni," tiin a sawi.

Spurs hian an hmelma leh elpui Arsenal tihel nan 'In Arsene We Trust' tih an tarlang a, Gunners fans leh season tawp ruala a contract tawp tur Arsene Wenger tan thil hmuh­nuam a ni lo khawp ang.

Argentine manager chuan sawi chhunzawmin, "Ka naute khelh danah ka lawm a, duhthusama ṭhain an khel. Hun chanve hnulamah kan ṭha zual a, kan nawr nat bakah hunṭha kan insiam hnem hle. Chelsea nen kan inkarah point li chiah a awm leh ta, eng nge lo thleng tur chu kan thlir zel ang," a ti.

Poch hian player naupang rual hmangin team khauh tak a din mek a, a player pawimawh te hi English mi an ni bawk - kum 1960-61 hnua a vawi khat nan league nomawi beiseina an nei sang rih hle.

Arsenal an ral mek

Wenger-a'n an inkhelh hmabakah 'Point hloh a thiang tawh lo' tiin sawi tawh mah se Tottenhman lakah point khat chauh pawh an hlawh chhuak zo lo. Gunners hian match 33 an khelh aṭangin point 60 an hmu a, table-ah parukna an ni. Champions League khel thei china awm Manchester City an phak lohna chu point ruk a ni - City hian match khatin an khel hnem zawk.

Spurs nen midfield-ah an inbei na a, pound maktaduai 30 man Granit Xhaka leh Victor Wanyama te chu inkhel thununtu nih inchuhin an innawk na hle. Pound maktaduai 11 man Wanyama hian Arsenal player ten ball an chang lai vawi 13 ngawt a chhuhsak a, player dangte aiin ṭum ruk zetin a sang fal - Swiss international Xhaka dahṭhatu a ni.

Arsenal hian goal khung tumin goal zawnah vawi li an pet thei a, Spurs hian vawi 11 zet an pet thung. Inkhel pumpuiah Gunners player an huaisen tawk lo zawk a, an tlarhnung a pawp bakah an hmatawng an bil zawk bawk tih a chiang.

Arsenal manager Wenger chuan, "Spurs khan chak an phu, kan result hi a lungawi thlak loh hle, kan sawikhawm ang. Season tira kan tum ber chu Spurs chunga awm ni loin nomawi chawi a ni," a ti. Wenger leh a naute hian an tum an thlen loh bakah an duh loh thlengin an tawng tihna a ni.

Wenger chuan sawi chhun­zawmin, "A sang pali zinga awm chu a harsa tawh khawp ang. Mahse, kan beidawng thiang lo, kan bei zel ang. Crystal Palace leh West Brom lakah goal kan khung lo bawk a, inenfiahna tur kan ngah," tiin a sawi.

Khelh Hmabak
Tottenham
Fri, 5 May West Ham (A)
Sun, 14 May Man Utd (H)
Thu, 18 May Leicester (A)
Sun, 21 May Hull (A)
Chelsea
Mon, 8 May Middlesbrough (H)
Fri, 12 May West Brom (A)
Mon, 15 May Watford (H)
Sun, 21 May Sunderland (H)
Sat, 27 May Arsenal (FA Cup final)