'The Cool One' - Khalid Jamil

"Mizo nihna pek mai ka duh" tiin nu pakhat a lo ṭawng lauh lauh a, "Thil mak a ni, thil mak" tiin a bula ṭhu chuan a lo chhawn ve mek bawk - Aizawl FC coach Khalid Jamil a chanchin an sawi a ni. Ni e, I League-a club budget nei tlem ber pawl ni chungin he Indian coach hian Aizawl FC a champion pui a, Mizo mipui hmaah, ni lo, khawvel hmaah tih tur zawk a ni. Sum aiin thinlung a ropui zawk tih a pholang a, hausakna aia beiseina hausak zawk thu hi a takin min hmuhtir a ni.

Aizawl FC an champion rualin season hmasaa khawvela barakhaihtu Premier League champion Leicester City an lang lo thei lo a, Khalid Jamil-a game plan, a nungchang, media a hmachhawn dan zawng zawng hretu tan Claudio Ranieri nen a khaikhin loh a harsa bawk - relegate tur club hmuha mite hmuh kha champion-ah an siam miau avangin!

Buaina chhumpui...

Kum 2007-ah Khalid Jamil-a'n Mumbai FC enkawlin a coaching career a ṭan a, season hmasa khan I League-a an tawn san ber ṭum tawngin pangana hial nihpui mah se ban a ni. I League-a coach ni rei ber dinhmun a chelh chu tihtawp sak a ni a, Khalid-a'n a hrethiam lo hle.

Indian Express senior correspondent Mihir Vasavda chuan, "Khalid hian ban a nih tirhin hrehawm a ti em em a, Mumbai-a a inah hrehawm ti takin a awm a, a club hmangaih em em hian an phatsan ang hialah a ngai a ni," tiin hetih hunlaia Khalid dinhmun Vanglaini palai hnenah a sawi a, tunah erawh kaihthawhin a awm ta!

Rinhlelhna karah

November 2014-ah Greece-in an coach Claudio Ranieri an ban a, July 2015-ah Leicester City-in coach a tan an lalut. English media-ten Foxes thutlukna mak an ti a, football expert leh Leicester player hluite meuh pawhin an club chet dan hi sawiselin rinhlelhna mit nen Italian manager an thlir.

June 2016-ah Mumbai FC-in Khalid Jamil an ban a, December 2016-ah Aizawl FC-in I League 2017 a kaihruai turin Indian coach hi an lalut. Attacking football hmuhnawm tak khel ṭhin Mizo club-in defensive game hmingṭhatpuitu coach an lalut hi Indian football hrechiangtu ten mak an ti a, 'game mawi tak kha tihboin a awm dawn a nih hi' tih chu an ngaihdan a ni - rinhlelhna karah Khalid-a'n bul a ṭan.

Hei le Khalid

Ranieri-a'n Foxes a zawm hmain Robert Huth, Christian Fuchs leh Shinji Okazaki ten Leicester an zawm a, Italian manager hian fing takin N'Golo Kante chu a budget neihsa milin a lalut bawk. Leicester-a player awmsate theihna Ranieri-a'n a hrechiang bawk a, season hmasa lawka relegate hlauhawm kha team ṭha takah a din.

Khalid Jamil-a'n a budget neihsa hre ranin fing takin players a lakhawm a, midfield-ah AFC zawm turin tawnhriat nei ngah Mahmoud Al Amna a hmin a, Mizo club-ah first choice a nih tur thu tiamin Mizo chak lohna lai goalkeeper chu Albino Gomes hmangin a thuam ṭha a, Mumbai FC-a a chhawr thiam sa Jayesh Rane leh Ashutosh Mehta a chhawm bawk.

The Cool One

Ranieri-a'n beisei phak baka ṭhain Leicester City a kaihruai a, season laihawl a thlen meuh chuan la ringhlel ru tak siin 'in champion thei ang em?' tih zawhna a dawng fo a, manager tawnhriat nei ngah Ranieri erawh a buai phah lo. A nauten pressure an neih loh nan an khelh leh tur chauh a ngaihtuah thu a sawi ṭhin a, champion a sawi duh ngai lo.

Khalid Jamil-a'n Indian football bara­khaihin Aizawl FC tan rin phak baka ṭha result a hlawhchhuahpui fo a, mah se he coach 'cool' tak hian a naute tan pressure siam a duh ngai lo. East Bengal laka hnehna an chan ṭum meuh pawn a ṭawng uang duh lo a, Mohun Bagan an hneh ṭum pawh khan media-te hmaa a thusawi chu 'champion sawi thei kan ni lo. Kan inkhel leh tur chiah kan ngaihtuah' tih hi a la ni cheu!

Mahni aiah players

Ranieri-a'n hlawhtlinna ropui tak a channa kawngah player-te a dah hmasa fo a, amah indah ṭhain a player-te thawhrim rah a nih thu chu a thusawi uar ber a ni ṭhin. An club tum tur a zirin player remkhawm a thiam a, a player-te theihna a hrechiang em em kha a fakawmna chu a ni.

Khalid Jamil a danglam lo, an result

ṭhat chhan a sawi apiangin ama thawhrimna aiah player-te thawhrimna sawi nuam a ti a, a player-ten sawiselna an tawh chang pawhin 'an theihtawp an chhuah a, ka lawm a ni' tiin a chhan tlat ṭhin. Player-te theihna a hrechiang a, substitution siam hun thlengin tihsual a nei ngai miah lo tih tur hial khawp a ni a, chu thu hrechiangtu te chu Shillong Lajong laka an inkhel entute kha an ni.

Ni e, Lajong nen inhnehtawka champion nomawi an chawi ṭum pawhin Mumbai coach hlui hian, "Ka player-te thawhrimna leh fan-te thlawpna kan hmuh ṭhat avanga champion kan ni. Kei chu engmah ka ni lo a, ka naute hi fak phu chu an ni," tiin amah ala insawi bang cheu.

Mi dangte faktu

Ranieri ropuina em em chu media-te a ṭhian ṭhaah a siam a, inkhelah beisei loh dan taka thutlukna siam a nih chang pawhin ṭawngkam ngeiawm a hmang ngai lo a, amah sawiseltute ngeiawm takin a chhanglet ngai lo a, a thiamna, tawnhriatna leh hruaitu ṭha nihna hmangin a chhehvela mi te a thunun ṭhin.

Khalid-a pawh chutiang chu a ni. Rilru hrehawm taka siama amah bantu Mumbai FC meuh pawh "Min duhtu ka neih loh laia min ring tlattu an ni a, an chungah ka lawm kumkhua ang," tiin zah tak chungin an chanchin a sawi ṭhin a, a club hi vawi hnih lai a hneh chung pawhin 'phuba' a sawi lang duh lo a, referee thutlukna mak a awm chang pawhin 'point thum ka hmuh chuan ka lawm' tiin a sawi mai ṭhin - a danglam a ni.

Khalid Lalropuia

National Football League aṭanga I League tih a nih hnuah India rama club inelna sang ber league-ah Dempo SC (2), Churchill Brothers (2), Salgaocar (1), Bengaluru FC (2), Mohun Bagan (1) leh Aizawl FC an champion tawh a, Mizo club champion ropui bikna erawh hrilh nawn kan ngai lo - club champion dang parukte hi chuan an champion kumin coach langsar bakah a hunlaia India a hlawh hnem pawl player an kawl ṭheuh.

Khalid chuan, "I League season ṭan a nih apiangin nomawi chawi ka duh ṭhin a, mah se hun ka la duh deuh erawh ka ring ṭhin. Aizawl FC ka enkawl chhunzawm dawn a, Aizawl hi ka hmangaih a ni," tiin a mang ram a hlawhtlin thu a sawi.

Indian football chanchin keu let a nih apiangin vawiina Aizawl FC hlawhtlinna hi sawi tel a ni ziah tawh ang a, mipui tluklehdingawn khat aia tam chenna India rama football khelh a nih chhung chuan Khalid Jamil a hming a reh tawh ngai lo ang. Kan lawm e aw, coach!