Serie A entu an awm theih beisei

Italian football inelna sang ber Serie A club 20 leh league thuneitute chu Thawhṭanni khan an inhmukhawm a, season kal lai chu a zawh hma ngeiin stadium chhungah fans awm thei se an duh.

Club leh league thuneitu lamin fans awm duh mah se Italian Football Federation leh sorkar rem tihna an la mamawh tel a, thuneitu sang zawk hnenah thu hi an thlen leh phawt ang, chumi hnuah an dinhmun tur a hriat dawn chauh.

Serie A club chuan thuchhuah siamin, "Stadium-ah a hma thei ang berin mipui lut thei se kan duh a, chumi tur chuan hmalak a ni dawn. Kan rawtna leh ruahmanna te chu chiang takin FIGC president Gabriele Gravina hnenah thlen a ni ang," an ti.

Covid-19 vangin Serie A hi thla thum chuang an chawl lailawk a, chumi hnuah a hmuna entu awm loin an khel zui leh tawh. Italy hi hri leng nasatna hmun ni mah se tun hnaiah a tlahniam zel, hri leng la reh lo mah se zawi zawiin an thunun thei ṭan tawh.