Championship khel tur Wycombe

Wycombe Wanderers chuan an club chanchina a vawi khat nan Championship an khel dawn a, English football-a division sang ber dawttu khel tur hian League One playoff final-ah Oxford United chu 2-1 in an hneh. 

Wembley Stadium-a inkhelah hian Anthony Stewart chuan minute kuana lekah Wycombe tan goal hmahruai a khung a, minute 57-naah Mark Sykes chuan Oxford beiseina siamsak turin si phurh a sut. Mahse, hun tawp nan minute 11 chauh a awm tawh tihin Oxford goalkeeper Simon Eastwood chuan Fred Onyedinma lakah penalty a chawi a, Joe Jacobson chuan harsatna nei loin goal-ah a chantir. 

Season thara Championship khel turin Wycombe an tling a, tun season-a an chanchin ringawt pawh hi a ngaihnawm tham hle. Kum 2014-a Premier League aia non-league club nih hnaih zawk hi season ṭantir kha chuan relegation battle hmachhawn tura ngaih an ni. 

Mahse, season hmasaa a hniam lam paruk zinga tel club hian rin loh takin season duhawm an hmang - heti chung hian Covid-19 vanga March thlaa league tihtawp lailawk a nih khan playoff khel tur zingah an tel phak lo. 

Wycombe vanneih kum a ni - Covid-19 vangin League One lama league round chu tihtawp a ni a, points-per-game hmangin table tih danglam a ni. A tira playoff khel phak lo Wycombe-in playoff an khelh theih phah a, semifinal-a Fleetwood Town an hneh hnuin final-ah Oxford United an hneh leh ta. 

Wycombe manager Gareth Ainsworth chuan, "Ka hlim takzet. Championship khel tura he team hruai thlen hi a awihawm loh zawk a, ka mumangah pawh ka man ngam loh a ni," a ti! League One playoff final-a sawi hlawh tak pakhat chu a chak em avanga hriat hlawh, kum 38 mi striker Adebayo Akinfenwa a ni. Liverpool ṭan em emtu striker hi inkhelh zawhah ṭhingṭhiin tihtakzetin a ṭawngṭai a, interview sawi hlawh zui hat a nei zui. Akinfenwa hian, "Tun dinhmuna WhatsApp-a min be thei awmchhun chu Jurgen Klopp chauh a ni ang, tichuan ani nen he hlimna hi kan lawm dun thei dawn a ni," a ti a, Klopp chuan WhatsApp video hmangin Akinfenwa hi a lawmpui zui.

 

Klopp chuan, "In inkhel ka en a, interview erawh ka en lo. Hendo nge, player dang ka hre lo. Chu chuan interview-a i thusawi min hrilh a, ka lawmpui takzet che a ni," tiin Wycombe tana season li chhunga match 173-a khelha goal 54 khungtu striker hi a lawmpui - Akinfenwa hi season tawpah a contract a zo dawn.