Goal khung thiam Monaco mualah Juventus

AS Monaco chuan zanin dar 12:15 hian Champions League semifinal first leg khel turin Stade Louis II-ah Juventus an mikhual dawn. French Ligue 1 hmahruaitu leh Italian champion inkhel tur hi Ten 2-ah live a ni ang.

European league lian panga zingah Monaco hi tun season inelna hrang hranga goal khung hnem ber an ni a, an mikhual tur Juventus hi a chhuah tlem ber an ni thung.

Monaco hian an match hnu­hnungah Borussia Dortmund 6-3 in an hneh a, German club an hneh ṭuma an player kum chawhrual chu kum 23 leh thla kua niin quarterfinal khel club pariat zingah an naupang ber. Juventus player-te erawh kum 28 leh thla sarih niin an upa ber, tawnhriat ngah leh thazâ rual an inkhel dawn tihna a ni.

Vawi thumna
Champions League bikah team pahnihte hi an vawi thum intawnna tur a ni. Kum 1997-98 season khan semifinal-ah hian an lo intawng tawh. Mo­naco khelmuala an inkhelh hmasak ṭumin Thierry Henry goal hmangin France club hian 3-2 in hnehna an chang. Turin-ah erawh Juventus hian Alessandro del Piero hattrick hmangin an lo lehthal.

Kum 2014-15 season khan quarterfinal-ah an intawng leh, he mi ṭum hian inkhel pahnihah goal khat chiah a lut. Midfielder Arturo Vidal-a penalty sawi hlawh tak hmangin Juve hi 1-0 in an tlang. Defender Ricardo Car­valho-a'n Juventus forward Alvaro Morata a tih­tlukna chu box pawn niin lang mah se Monaco hian penalty an chawi!

En bik tur Mbappe
Monaco hian kum 2000 hnua a vawi khat nan Ligue 1 nomawi chawi an beisei, inkhelh hmabak pali an la neihah point ruk an hlawh chhuak a nih chuan an champion dawn. Champions League lamah pawh Leonardo Jardim-a naute hian 'rinkai lo' ni chungin season bul ṭan mah se tunah chuan ngaihthah theih an ni tawh lo - season duhawm an hman mek theih nana hming langsar chu Kylian Mbappe a ni.

Kum 18-a upa Mbappe hi season ṭan dawn kha chuan mi hriat hlawh a la ni lo, a chanchin hi football ngainatu zingah pawh ngaihventu an la tam lo. Season hmasa khan Monaco tan inelna hrang hrangah match 14 a khelh aṭangin goal khat chiah a khung, hetichung hian amah hrechiangtu Jardim-a'n France rawlthar chungah rinna a nghat.

Manager berin a rinngam chuan Mbappe tan khelmual chhungah hlauh tur a awm tawh lo. Monaco rawlthar duhawm hian last 16-a Manchester City an hneh ṭumin inkhel pahnihah goal a khung. Dortmund an hneh ṭum pawhin a goal khung a chawlhsan chuang lo - Cham­pions League knock out stage match khelh hmasak palia goal khung thei vek awmchhun a ni ta.

Jardim chuan, "Season tir lam khan Kylian hi kan chhawr rim lo a, chuvangin player dang ṭhenkhat aiin a la hah lo deuh. Rawlthar tha za rual chauh a la ni a, chuti chung chuan a huaisen bakah inrintawkna a nei," tiin a player duhlai chungchang a sawi. Juve tlarhnung tan Mbappe hi ven ngun ngai bik tur a ni ang.

Buffon a tan
Italy international goal­keeper Gianluigi Buffon hi World Cup champion a ni tawh a, club lamah Juventus tan Serie A nomawi pasarih zet chawi tawh mah se Champions League-ah a la champion lo. Kum 39-a upa Buffon hian UCL champion nih a duh a, a kum chhutin tun season hi a tan hun ṭha bera ngaih a ni.

Juventus legend hian Mona­co lakah si ban a nghak leh ngei dawn. Buffon-a captain na hnuaiah Turin club hian tun hnaiah an tlarhnung an venghim ṭha hle. Champions League knock out stage chinah hian goal an la chhuah miah lo! Lionel Messi, Luis Suarez leh Neymar te awmna Barcelona lakah minute 180 chhung an goal an venghim thei - Catalan club hi 3-0 a hnehin semifinal hi an inhlangkai.

Barcelona aṭanga Juventus zawmtu Dani Alves chuan an keeper Buffon tan nomawi chawi an duh thu a sawi. Defender Alves chuan, "Turin ka thlen aṭang khan ka rilru a bet nghal thlap. He hmuna ka thil hmuh tel chiang tak pakhat chu Buffon ropuina hi a ni. Ani hi hotupa a ni a, player naupang zawk tan huaisenna leh inrintawkna siamsaktu a ni, a tan nomawi chawi ngei kan tum," tiin a sawi.

Juventus hian a zawna season ruk nan Serie A nomawi an chawi leh ngei dawnin a lang tawh. Massimiliano Allegri naute chakna thuruk chu an tlarhung phui a nih rualin hmatawng lam sawi hmaih a thiang lo. Khawvela player manto pa­thumna Gonzalo Higuain an nei a, Barcelona laka goal hnih khung thei Paulo Dybala leh Mario Mandzukic an nei bawk.