Ferrari-in hmabak an ngah - Ross Brawn

Formula 1 managing director Ross Brawn chuan tun hnaia Ferrari ke chheh fuh hleithei lo chu a vei a, tun hma lama an ropuina leh ṭhatna ang kha nei let leh tur chuan hmabak an la ngah thu a sawi.

F1 huangah chuan Ferrari hi team hlun leh chungnung an ni. Amah-erawhchu an chungnung hun lai sawi tur chuan 'hman deuh khan' tih a ngai tawh, tun hnaiah Mercedes an phak lo hle - Red Bull an awm bawk avangin Ferrari tan driver leh team champion nih a awlsam lo hle a ni.

Kum 2000 bawr chho vel khan Ferrari hian Michael Schumacher hoin F1 an thunun ṭhin, kha tih hun laia an technical director chu Brawn-a hi a ni a, tunah erawh Formula 1 managing director a ni tawh thung. Brawn chuan, "A bul ṭhutah eng nge fuh tawk lo tih an hriat chhuah vat a ngai, an insiamṭha thuai a ni loh chuan tun dinhmunah team ṭha dang elphak tur an ni lo ang. Team enkawltu lamin ngun takin ngaihtuahna hmang se la, chumi hnuah thutlukna ṭha a lo chhuak ang.

"Ka tawnhriat aṭanga ka chhutpui dan chuan media lamin boruak an siamsak hi an zo lo deuh a ni mai thei. A bik takin Italy ramah chuan thu thar thehdarhtu lam hian an ṭhat lohna leh ṭhatna lai hrang hrang an ziak nasa, chumi chuan a kaihruai ve thei em em a ni," a ti.

Tun season-ah intlansiak pahnih an hma-chhawn tawh a, team champion lai Mercedes driver ve ve in hnehna an chang. Pathianni zana Styrian Grand Prix an tlanah phei chuan Ferrari driver pahnih Charles Leclerc leh Sebastian Vettel te intipalhin an tlan tluan ve thei lo. F1 hi coronavirus vangin season ṭan hun pangngaiah an ṭan thei lo a, inelna neih tur zat pawh a la chiang lo. Intlansiak pathumna atan tun kar tawp hian Hungaroring-ah Hungarian Grand Prix an tlan leh ang.