Bengaluru leh Bagan inlan dawn

Zaninah Asia rama football club inelna sang ber dawttu AFC Cup khelh a ni dawn a, season hmasa finalist Bengaluru FC leh Mohun Bagan an inlan dawn.

Bengaluru FC-in Aizawl FC lakah an I League nomawi an hloh tawh avangin Asia huap inelnaah champion ngei an tum dawn a, zanin dar 5:40-ah Bangladesh club Abahani Ltd Dhaka an lenchilh ang.

Barcelona assistant manager hlui Albert Roca enkawlna hnuaia khel Bengaluru hian I League-ah beisei phak lo mah se AFC Cup-ah erawh Group E-ah awmin match thum khelh tawhah hnehna an chang fai vek a, group hmahruaitu an ni mek - chak hmel la hmu lo Abahani tan tawh an khirh dawn.

Bangalore club hian an match hnuhnung berah hrem vangin Cameron Watson leh Sandesh Jhingan chhawr thei lo mah se zaninah erawh player pawimawh pahnih hi an inlan thei tawh dawn thung a ni.

Hetihlai hian Mohun Bagan chuan nimin khan AFC Cup khel turin Maldives an pan ve bawk a, Kolkata club hian Federation Cup an ngaihpawimawh zawk avangin Maldives-ah hian player langsar zingah Katsumi Yusa leh Jeje Lalpekhlua bak an hruai tel lo.

May 8-a Fed Cup match hmasa ber khel tur Bagan hian vawiin tlai dar 4:30-ah hian Maldives champion Maziya Sports & Recreation Club an lenchilh dawn a ni.