Tlai dar 3:30-ah Mizoram Vs West Bengal
National Junior Football Championships (BC Roy Trophy)-ah Mizoramin an khingpui hneh vekin semifinal an lut a, vawiin tlai dar 3:30 hian anmahni ang bawka group match-a chak vek West Bengal chu Bhilai, Chhattisgarh-ah an hmachhawn ang.
Semifinal pakhat zawk hi Bilaspur-ah khelh a ni ang a, champion lai Punjab leh Kerala te an inkhel ang. Final hi May 5 khian Bhilai-ah khelh tur a ni.
West Bengal bawk!
Santosh Trophy semifinal-ah Mizoramin penalty shootout hmangin West Bengal an hneh lo. Sub Junior-ah erawh Mizoramin semifinal West Bengal sawpin an champion zui a, Khelo India final-ah Mizoramin West Bengal hnehin nomawi an chawi bawk.
Heng inkhel pawimawh pathum hi kumin chhunga thleng vek a ni. BC Roy Trophy hnuhnung ber nikuma neihah Mizoram hi Karnataka leh Meghalaya-te inlan loh vangin West Bengal nen chiah group khatah an awm a, vawi hnih inhmachhawnin hnehna an chang ve ve. Mizoram hian final thleng zui mah se penalty shootout-ah Punjab an hneh loh avangin nomawi an humhim thei lo.
A lum!
Inelna neihna hmun Chhattisgarh a lum avangin semifinal-ah hian cooling break vawi hnih a awm dawn.
Mizoram manager Hming-thansanga chuan, "Tlai lamah hian 40 degree celsius te a nia, a lum hle. Managers meeting-ah cooling break neih kan rawt a, first half minute 33-naah leh second half minute 66-naah a awm ang," tiina lum thu a sawi.
Hmingsanga chuan sawi chhunzawmin, "Kan thlenna hi chu a nuam a, khaw lum hi kan harsatna ni mah se kan châm rei leh tawh avangin a tawrh dan pawh kan thiam ṭan tawh," tiin an harsatna chu nomawi daltu atana chhuanlamah hman a tum lo.
Semifinal chu
West Bengal hian semifinal lut turin Tamil Nadu, Assam leh Goa te an hneh vek. Mizoram hian Uttarakhand leh Delhi te an hneh hnuin semifinal an lut a, group match hnuhnung bera Jharkhand an hmachhawn ṭumin starting eleven pangngai aṭangin player pasarihte chu hahdamna hun an pe bawk.
Mizoram hian West Bengal ai hian ni khatin group match an zo hmasa zawk a, khua a lum bawk avangin hahdamna hun ṭha hi final luhna kawngah a pawimawh thei ang.
Tiphurtu AFC!
Tun hnaia Mizoram result chuan phurna a pek thu sawiin Hmingsanga chuan, "Aizawl FC-in I League an champion hian chona min siam a, phurna min pe bawk. Sub Junior-ah Mizoram an champion tawh a, kei ni pawh champion thei turin kan ṭha tawk a, kan discipline ṭha hian mal sawmna a thlen ngei ka beisei," tiin Vanglaini palai a hrilh.
BC Roy Trophy - Thlirna Tawi
Group Stage
April 26, Nilaini
Mizoram 5 - 0 Uttarakhand
MIZ : Lalṭhapuia 22', 69'; Lalthanmawia 43'; Zakaria Lalhriatpuia 57'; Lalhruaitluanga 83'
April 28, Zirtawpni
Delhi 0 - 2 Mizoram
MIZ : Lalruatfela 43'; Lalremmawia 83'
April 30, Pathianni
Mizoram 2 - 1 Jharkhand
MIZ : Lalruatpuia 32'; Lalremmawia 56'
Semifinal - Vawiin Inkhel Tur
3:30 PM Mizoram Vs West Bengal
3:30 PM Punjab Vs Kerala
Final - May 5, Zirtawpni