LM Store MFA Futsal Cup Kick Off a ni ta

AIFF leh MFA pawmpui Mizorama futsal inelna hmasa ber tur, LM Store MFA Futsal Cup 2017 chu nimin khan Miss Mizoram 2017 Rody H. Vanlalhriatpuii'n Hawla Auditorium-ah a kick off - May 4-ah khelh ṭan a ni ang.

Team 166 telna tur inelna hian football hmel a thlak dawn a, naupang aṭanga kum upa thlenga tel theih a nih avangin tualchhung football tan rahbi thar pawimawh tak a ni dawn.

Kick off hi MFA honorary secretary Lalnghinglova Hmar chuan a kaihruai a, technical officer Danny Lalduhawma'n futsal dan leh hrai video hmangin a hrilhfiah a, MFA technical committee secretary R. Lalramzauva kaihruaiin tie draw neih a ni bawk.

LM Store MFA Futsal Cup-ah hian veteran inelnaah team 14 an tel a, inelna pangngaiah team 152 an tel. Rajiv Gandhi Stadium, Mualpuiah khelh ṭan a ni ang a, May 13-ah final hi R. Dengṭhuama Indoor Stadium-ah khelh a ni dawn a, inelna tawp lam hi television-a en theiha tihlan a ni ang.

AIFF leh MFA pawmpui Mizorama futsal inelna hmasa berah hian official ball-ah Nivia hman a ni dawn a, Nivia company chuan MFA hnenah futsal ball tura siam bik chu he inelna atan hian an thawn thleng tawh a ni.

He inelnaah hian lawmmanah pawisa fai Rs 1,25,000 sem ral a ni dawn a; MFA chuan futsal hi lian zawk leh mumal zawka kalpui tumin ṭan a la zel a, AIFF nen India rama Futsal Workshop hmasa ber an buatsaih tawh bakah futsal inelna hrang hrang leh futsal league thlengin din chhoh zel a tum a ni.

LAWMMAN

Open Category

Champion Rs 50,000

Pahnihna Rs 25,000

Semifinalist Rs 10,000

Quarterfinalist Rs 1,000

Veteran (Above 35 years)

Champion Rs 10,000

Pahnihna Rs 5,000

Semifinalist Rs 2,500