Aizawl FC-in September thleng hun nei

I League champion Aizawl FC chuan India ram club inelna sang berah nomawi an chawi avangin season tharah AFC Champions League playoff an khel thei dawn a, mahse he inelna hmachhawn tur hian AFC licence neih a ngai. Asia rama football thuneitu sang ber Asian Football Confederation chuan Mizo club hi September thla laihawl thleng hun an pe a ni.

Tun dinhmunah Indian club zingah Bengaluru FC chiahin AFC licence an nei a, licence neih ngai langsar tak pakhat chu club-in AFC pro licence emaw a tlukpui nei coach an nei tur a ni, tih a ni a, Khalid Jamil-a'n AFC pro licence a neih avangin coach chungchangah chuan Aizawl FC an buai lo ang.

All India Football Federation (AIFF) chuan Aizawl FC dinhmun hi AFC hnenah a hriattir leh ang a, Asia khawmualpuia football thuneitu sang ber AFC hian thutlukna an siam ang. Aizawl FC hian AFC licence nei thei ta lo pawh ni se AFC Cup-ah erawh group stage aṭangin an inlan thei dawn tho a, Europa League tlukpui inelnaa inlan tur hian national licence neih a tawk a ni.