Liverpool chakna Emre Can goal ropui
Goal a awm a, chumi chungah chuan goal ropui a awm leh a, goal ropui bik tia sawi tur pawh a la awm cheu. Goal khat hlutna in ang vek mah se 'hriatreng tlak' goal erawh a awm - chutiang goal chu a ni Emre Can-a'n Watford laka a khung kha.
Thawhṭanni zan khan Liverpool hian 1-0 in Watford an hneh a, German midfielder Can chuan Lucas Leiva hnen aṭanga a ball hmuh chu bicycle kick hmangin mawi zetin a khung - Reds tan Champions League a hnai leh sawt a, match khata khel tam zawk chungin an hnuai chiaha awm palina Manchester City aia an sanna chu point thum a ni.
Liverpool-in Premier League-ah match thum chiah khelh tur an nei tawh a, Anfield-ah Southampton leh Middlesbrough mikhualin khualmualah West Ham an lenchilh ang - hmabak huphurhawm tak niin a lang lo.
Reds hmabak a eng
Liverpool-in kartawp Premier League-ah an elpui Manchester City, Manchester United, Arsenal leh Everton an tawlhthlu tih hriain an hun ṭha neih chhawr loh an duh lo a, a hunah tak hnehna an chang - Reds buaina erawh a la ngai reng a, set piece-ah Watford an hlauhawm ṭhin hle.
Inkhelh hmain Jurgen Klopp-a'n an khingpui te a ruala an tawlhthlu vek mai chu mak a tih thu a sawi a, chutihrualin an hun ṭha neih an bawhpelh a thian loh thu a sawi bawk - Klopp-a nauten an pu beiseina a thlawn chantir an duh lo a, an inkhelin beisei phak lo mah se point thum hlu tak an hlawh chhuak.
Lallana a lo kir
Liverpool tan hliam vangin minute 13-na lekah Philippe Coutinho lakchhuah a ni a, Brazilian midfielder aia rawn tlan lut erawh Reds match hnuhnung pangaa hliam vanga inlan thei lo Adam Lallana a ni. English midfielder hian Hornets keeper Heurelho Gomes chetsual nangchingin crossbar a pet per.
Reds hi awlsam taka chak erawh an ni bik lo. Watford defender Sebastian Prodl-a'n injury time-a a hun ṭha neih bar pet per nana a hmang chu an vannei takzet a, Etienne Capoue leh Daryl Janmaat shot ṭha zet chu Reds keeper Simon Mignolet-a'n ṭha zetin a dang bawk.
Lallana chuan, "Match thum chiah kan hmabak tawh a, engkim hi kan kutah a awm tawh avangin kan rilru zawng zawng kan pek a ṭul," tiin a sawi.
Yes, he Can!
Watford khelmualah first half hmuhnawm lo tak khelh a nih laiin Reds midfielder Can a inlar a, chawlhlawk hman a nih hma chiahin a goal ropui hi a khung - Watford player-te tan pawh mak ti taka thlir bak tih theih a awm lo. Kum 23-a upa midfielder hian Lucas hnen
aṭanga a ball hmuh naran tak chu uluk takin a lo thlir a, player naran tana tih theih loh chu a thiamna leh thluak
ṭangkawp hmangin a khung.
Germany international chuan, "Ka goal khung tawh a zawnga ropui ber a ni. Hmun awl awm kha hmuin ka tlan nghal a, a tirah chuan ball lo tauh kha ka tum a ni. Mahse, rei inngaihtuah a ngai hran lo a, ka rilru kha ka thlak leh a ni," tiin a goal chungchang a sawi.
Champions League beiseina
Liverpool manager Jurgen Klopp chuan, "Pressure kan nei a, mahse kan lakah beiseina a sang a nih chuan kan hmaah sual chhuah tur thil ṭha tak a inchhawp tihna a nih avangin kan rilru zawng zawng kan pek zel a ṭul a ni," a ti.
German coach chuan sawi chhunzawmin, "Champions League khelh hi thil awlsam tak a ni dawn lo. Kan khelh leh hmasak ber tur Southampton lakah te hian point thum hmu saah min ngai a nih chuan tun season-a Saints inkhel hi inla en lo tihna a ni ang. Watford lakah kan game ṭha ber kan khel lo a, a pawimawh ber erawh chu point thum kan hlawh chhuak kha a ni," tiin a sawi.
Inkhel Chhehvel
• Emre Can-a'n tun season Premier League-ah goal nga a khungna chiah a ni a, Reds tana a season hnuhnung pahniha a goal khung aiin a tam zawk.
• Lucas Leiva-a'n a league match hnuhnung pangaah a
ṭhiante tan assist vawi thum a nei a, top flight match-a a inlan hnuhnung 163-a assist a neih zat nen a in ang!
• Liverpool-in khualmualah a zawna vawi thum nan league-ah chak hmel an hmu a, Klopp-a hnuaia hetiang hun an tawn vawi hnihna chiah a ni.
• Reds midfielder James Milner-a'n Premier League-a a match 450-na a khel tling chiah a, heti zat Premier League match khel thei player 22-na a ni.