French Open khel tur Federer
Roger Federer chuan kumina Grand Slam pahnihna tur French Open khel turin a hming a ziah tawh thu a sawi chhuak. French Open hi May 22 - June 11 inkarah khelh a ni ang.
Grand Slam vawi 18 champion tawh Federer hian Africa rama naupang ṭanpui ngaite ṭanpui nan Washington-ah exhibition match a khel a, John Isner chu 6-4, 7-6 (9/7) in a hneh. US-a an inkhelh hnu hian kum 2015 hnua a vawi khat nan Roland Garros a khelh tur thu hi a ti chiang a ni.
Kum 35-a upa Federer chuan, "Roland Garros khel turin ka hming ka ziak tawh. Hliam leh hun harsa ka paltlang hnuah hun nuam tak ka hmang leh mek a, player naupang zawkte nena inelna hautak hmachhawn hi a nuam ka ti hle. Chutihrualin ka kum a tam deuh tawh a, tournament zawng zawng khel thei ka ni tawh lo tih erawh ka hrechiang," tiin a sawi.
Mipa tennis player zinga Grand Slam champion hnem ber Federer hi nikum khan a hnungzâng leh khup a hliam a, Wimbledon hnuah inelna a hmachhawn leh lo. Kuminah hliam nei loin a rawn kir leh a, Australian Open bakah Miami leh Indian Wells-ah a champion leh tawh a ni.