Anthony Joshua lakah beiseina a sang

Boxing promoter lar Barry Hearn chuan Tiger Woods-a'n tun hnai kum 20 chhunga golf a chawisang ang hian World heavyweight champion Anthony Joshua chuan boxing a chawilar theih a rin thu a sawi.

Kum 27-a upa boxer hian Pathianni khan Ukrainian boxer ropui Wladimir Klitschko chu Wembley-a mipui 90,000 chuang hmaah a tukdawl a, WBA leh IBF kawnghren hlawh chhuakin inhnek a hma­chhawn tawh 19-ah tlawm hmel a la hmu lo.

Joshua promoter Eddie-a pa Barry Hearn chuan, "Infiamna tin hian a theh lar turin mi pakhat an mamawh ṭhin a, Joshua hi he infiamna huang chhunga mi entawn tlak ber a ni. Joshua leh Tiger Woods hian in anna em em an neih chu mipui ngaihsak hlawh tawh loh infiamna kha sang takah an rawn vawrh a ni," tiin a fapa nena thawkdun boxer chu a chhuang hle.

Hetihlai hian Tyson Fury chuan a British pui Joshua chu a hnung lama a kut pakhat phuar chung pawhin a cho thu a sawi! Kum 28-a upa Fury hian November 2015 khan Klitschko chu point-in a lo hneh tawh a, Joshua hian Pathianni zing an inhneh zawh hnu lawkah khan Fury hming hi a lo cho tawh a ni.

Fury chuan, "Hnehna chang turin style-te pawh a ngai ve a ni mai thei a, mahse hnung lama ka kut pakhat phuar chung pawhin Joshua hi ka hneh thei tih ka chiang. Inhmachhawn hi a duh tak tak a nih chuan inbuatsaih hranpa pawh ngai loin ka hmachhawn thei ang," tiin a cho hle.

Vawi 25 inhnek a hma­chhawna vawi 18 a khingpui knock out a, tlawm hmel la hmu lo Fury hian a rilru lamah harsatna a neih avangin a world heavyweight title kawl lai chu a lo kalsan tawh a, boxing licence nei loin a awm mek.