Bengaluru-ah Cornell Glen a lut

I League-a beisei phak lo Bengaluru FC-in Federation Cup nomawi chawi ngei an duh a, an striker inhliam Marjan Jugovic awm loh hlana a hmunruak luah turin Cornell Glen chu Bangalore club Ozone FC aṭangin loan-in an lalut.

Mohun Bagan striker hlui hi Asian Football Confederation dan ang erawh chuan AFC Cup-ah a inlan thei dawn lo thung. Trinidad and Tobago tan vawi 71 a inlana goal 24 khung thei striker chuan, "Match ka khelh apiangin hnehna chan ka duh ṭhin a, chu rilru pu chung chuan Bengaluru pawh hi ka pan a ni. Players ṭha tak tak leh coach ṭha tak enkawlna hnuaia khel tur ka ni a, ka phur tawh takzet," tiin a sawi.

Bengaluru coach Albert Roca chuan, "Jugovic-a in fit chho ṭan a, goal a khung ṭan ta maw tih veleha kan chan hi pawi ka ti takzet. Mahse, India rama tawnhriat ngah tawh Cornell kan lakluh theih avangin ka lawm a ni. Federation Cup-ah result ṭha tak neih kan duh avangin kan tan a pawimawh dawn a ni," a ti.

Kum 36-a upa Glen hi India-ah a mikhual lo hle. Kum 2006 FIFA World Cup-a Trinidad tana inlan striker hian Shillong Lajong aṭangin India a hmelhriat ṭan a, Indian Super League-ah pawh NorthEast United tan khelin 2016 khan Mohun Bagan a pan. Kolkata club a chhuahsan hnuah Ozone FC a pan a, tunah chuan Bengaluru tan a khel dawn ta.