May 7 atangin Federation Cup

India rama football club-te knockout hmanga inelna ngaihhlut Federation Cup chu May 7 aṭangin Cuttack, Odisha-ah khelh ṭan a ni dawn. I League champion Aizawl FC chuan an match hmasa berah pariatna Chennai City an hmachhawn ang a, Fed Cup champion lai Mohun Bagan bul ṭanna tur chu season liam taa tel pha lo DSK Shivajians an ni.

Fed Cup chu

Federation Cup hi kum 1977 aṭanga khelh ṭan a ni a, kum tina neih ṭhin a ni. Kum 1997-a National Football League khelh ṭan a nih khan Federation Cup hlutna a tlahniam a, tun dinhmunah chuan I League zawha inelna hlu ber niin champion tan AFC Cup khelh theih a ni.

April 2015 khan All India Football Federation chuan kum 2-3 chhung chu Indian Super League leh I League vanga buaina a awm hlauin Fed Cup titawp rih turin a rel a. Amaherawhchu Asian Football Confederation-in season khatah club-te chu match 18 tal khel tura a tih avangin Fed Cup chu khelh chhunzawm zel a ni.

Pahnihna ni lai AFC

Season liam ta khan I League-ah Aizawl FC chu relegate mah se table-ah pariatna an nih avangin Fed Cup an khel pha tho a. Mizo club hian Bengaluru FC leh Sporting de Goa hnehin final an lut.

Guwahati-a final khelhah Aizawl FC-in Mohun Bagan 5-0 in hneh lo mah se he inelnaa an chet ṭhat hi AIFF-in Mizo club chungchanga thutlukna an thlak lehna chhan pakhatah ngaih theih a ni.

Kalphung thar

Season liam ta khan Federa­tion Cup hi home leh away-a khelh a ni a, tun ṭumah erawh hmun pakhatah chauh khelh a ni tawh ang.

Inelnaa tel pha tur hian I League-a che ṭha pariat an tling a, Khalid Jamil-a club hlui Mumbai FC leh Minerva Punjab te erawh an tel pha lo. Team pariat hi group hnih­ah

ṭhen an ni a, vawi khat ṭheuh inkhelh kual hnuah a sang pahnihin semifinal an lut ang.

Group A-ah Aizawl FC (1-na), East Bengal (3-na), Churchill Brothers (6-na) leh Chennai City (8-na) te an awm a, Group B-ah Mohun Bagan (2-na), Bengaluru FC (3-na), Shillong Lajong (5-na) leh DSK Shivajians (7-na) te an awm thung.

Semifinal hi May 14-a khelh tur a ni a, final khelh hun erawh tihchian theih a la ni lo. AFC Cup-ah Mohun Bagan hian May 17 khian an mualah Bengaluru FC an mikhual dawn a, heng club pahnih emaw pakhat zawk hian final an lut a nih chuan nomawi inchuhna hi May 21-ah khelh a ni ang a, an luh loh ve ve erawh chuan May 18-ah final khelh tur a ni.

Federation Cup - Group Stage
Group A
May 7, Pathianni
East Bengal Vs Churchill Brothers
Aizawl FC Vs Chennai City
May 9, Thawhlehni
Chennai City Vs East Bengal
Churchill Brothers Vs Aizawl FC
May 11, Ningani
Chennai City Vs Churchill Brothers
Aizawl FC Vs East Bengal
Group B
May 8, Thawhtanni
Bengaluru FC Vs Shillong Lajong
Mohun Bagan Vs DSK Shivajians
May 10, Nilaini
DSK Shivajians Vs Bengaluru FC
Shillong Lajong Vs Mohun Bagan
May 12, Zirtawpni
DSK Shivajians Vs Shillong Lajong
Mohun Bagan Vs Bengaluru FC