England hmeichhe team enkawl duh an tam

Football Association hnuaia hmeichhe football hotunu Baroness Campbell chuan England hmeichhe team enkawl hna diltu mi 142 zet an awm thu a sawi a, "Kan rin aia tamin an dil a ni," a ti. 

Manchester United defender hlui Phil Neville chuan England hmeichhe team hi a enkawl mek a, mahse nakkum nipuiah a hna hi a chawlhsan dawn - Neville hmun ruak luahtu chuan Euro 2021-ah England hi a kaihhruai a ngai dawn a, Tokyo Olympics-a Great Britain hmeichhe team kaihhruaina chance a sang viau bawk. 

Campbell chuan, "A tawp min hruai thleng theitu tur kan zawng a, player-te hian a ṭha ber an phu a, a ṭha ber hmuhsak theih ka inbeisei a ni," a ti. June thla tawp khan England hmeichhe team enkawl hna dilna hun hi khar a ni tawh a, tun dinhmunah chuan kum 2015 leh 2019 World Cup-a US champion puitu Jill Ellis, Chelsea manager Emma Hayes, Manchester City coach hlui Nick Cushing Manchester United coach Casey Stoney hming a ri ring hle.