Cavaliers chak zanah James a ropui
LeBron James chu Cleveland Cavaliers tan a hlutna a zual chhunzawm zel. James hian nimin zing khan Toronto Raptors lakah point 35 a score bakah rebound vawi 10 lain a club hi 116-105 in hnehna a chanpui.
Quicken Loans Arena-a NBA playoff conference semifial inkhelah Cavs tan James chu a dan pangngaiin player pawimawh leh langsar a ni leh. NBA champion tan hian point 24 a score bakah a ṭhiante score tur vawi 10 siamsaktu Kyrie Irving leh Kevin Love (18 points) ten an thawhhlawk hle bawk.
Kum 32-a upa James chuan, "Game 2 kan khelh hunah chuan tun aia ṭha zawkin ka khelh theih ka beisei. Kan team kal dan hi chu film ang mai niin ka hre ṭhin - inkhel a pawimawh hunah hian kan cheṭha chho ve chiah ṭhin a ni," tiin a sawi.
Cavaliers hian regular season-ah beisei an phak lo a, Boston Celtics hnuaiah awmin Eastern Conference-ah pahnihna an ni. Mahse, playoff khelh a nih hnuah erawh an ze tak tak an chhuah mek. First round-ah Indiana Pacers chu series-ah 4-0 in an sawp a, regular season an match hnuhnung bera an hneh loh Raptors an hneh zui leh nghal bawk. Ningani zing dar 4:30-ah Raptors nen hian semifinal Game 2 an khel leh ang.
Nimin zing inkhel pakhat zawkah San Antonio Spurs chu an mikhual Houston Rockets lakah 126 - 99 in an chak lo. Ningani zing dar 7:00-ah Game 2 an khel leh ang.
Regular season lai khan Western Conference lamah team pahnih hi an lo inel tawk hle a, Spurs hi pahnihna niin an hnuai chiahah Rockets an awm.
Playoff-ah erawh Rockets hi dinhmun ṭhaah an ding hmasa ve thung. Game 1-a hnehna an chan theih nan hian Trevor Ariza (23points) leh James Harden (20) te an khelṭha hle.