Premier League relegation battle : Tu nge tla dawn?
Team 20 inelna Premier League-ah a hnuai pathum an relegate dawn a, Manchester United manager hlui David Moyes-a enkawl Sunderland chu tla hmasa ber an ni. Black Cats hnung zui tur club pahnih an awm dawn a, match thum khelh tur la awm tingaihnawmtu tur a ni ngei ang.
Middlesbrough (19-na; 28 pts)
March 16, 2017 khan Middlesbrough chuan Premier League-a hlangkaitu Aitor Karanka chu an ban a, hetih hunlai hian Boro hi relegation zone aṭangin point thumin an la him. Tunah erawh Middlesbrough hi Sunderland hnung zui tura ngaih an ni a, him china awm Hull City an phak lohna pawh point ruk a ni.
Karanka awm loh hnuah Boro hian league match riat an khel leh tawh a, an hneh chhun pawh relegate zui ta Sunderland a ni. Manager lai lawk Stephen Mark Agnew hnuaia an result duhawm ber chu Manchester City an chelh thei kha a ni a, him phahna tur erawh a la ni pha lo.
Boro hian Chelsea, Southampton leh Liverpool an la hmachhawn dawn a, an relegate ngei rinawm mah se Blues champion-na kawngah erawh an la hnawksak pha ang.
Swansea City (18-na; 32 pts)
Welsh club Swansea hian an duh ang result an neih theih loh avangin tuna manager Paul Clement hma hian Bob Bradley leh Francesco Guidolin te ban an ni tawh.
Swans-in an chunga awm Hull an phak lohna hi point hnih chauh a ni a, Old Trafford-a point khat hlawh chhuak thei an nih avangin an la him theih a rinawm. Welsh club khelh hmabak hi Everton, Sunderland leh West Brom te an ni a, fixture harsa a ni hran lo.
Hull City (17-na; 34 pts)
Hull City hi an hnuai chiah a awm Swansea aiin point hnihin sang zawk mah se goal difference-ah Welsh club an phak loh avangin tling chiang turin chak vek an la ngai tho.
Tigers hian tla chiang tawh Sunderland leh dinhmun hlauhawma la awm Crystal Palace an hmachhawn zawhah champion tum Tottenham Hotspurs an la khel dawn. Marco Silva hote tan an khelh hmabak hmasa hi a pawimawh ang.
Him tura ngaih
League table-a 16-naa awm chin Crystal Palace an him a rinawm tawh a, amaherawhchu Sam Allardyce kaihhruai club hian an match hnuhnung pahniha point an hmuh loh avangin chesual thei an la ni.
Eagles hian kartawpah Manchester City an tlawh dawn a, hemi zawh hian an elpui Hull City leh Manchester United te an la khelhpui dawn. Palace tana an innghahna tur chu tawnhriat ngah Big Sam a ni a, English coach hi relegation battle-ah chuan thlamuanpui tham a ni.
West Ham leh Burnley ten point 38 ve ve an hmu tawh a, chhiarkawp dana him chiang turin point li dang an mamawh a, tuna an point hmuh pawh hi season tawpah chuan him pui turin a tawk a rinawm. Chutiang chiah chuan chhiarkawp dana la him lo, point 40 hmu pathum Watford, Stoke City leh Leicester City te hi ngaihtuahawm an ni tawh lo.