Pune tan Ben Stokes a vul

Indian Premier League khelh meka player hlawh hnem ber Ben Stokes-a'n a hlawh atana Rising Pune Supergiants insen huai chhan a pholang a, Thawhṭanni zan khan wicket ngaa Gujarat Lions an hnehna inkhelah century a siam.

Pune khawpuia inkhelah mikhual team Gujarat an vaw hmasa zawk a, over 19.5-ah run 161 siamin wicket 10 an hloh. Gujarat tan Brendon McCullum chuan run 45 siam mah se batsman dang zingah thlawptu a hmu lo a, Lions batsman ten Pune tana wicket thum ve ve latu Jaydev Unadkat leh Imran Tahir an ngam lo.

Pune vuak hun a thleng a, run 14 an siamin wicket li an hloh fel der tawh! Mahse, English all rounder Ben Stokes a lo pen chhuak a, ball 63 a hmachhawnah run 103 ngawt vaw chhuaka a tawp thleng damin a team hi hnehna a chanpui - Pune hian over 19.5-ah an target umphain wicket nga an hloh a ni.

Royal Challengers Bangalore-in chak hmel an hmu hleithei lo a, match thum chhung a zawna an tlawmna ni turin Mumbai Indians chu wicket ngain an ngam lo. RCB hi bat hmasa zawkin over 20-ah run 162 an siam a, wicket riat an hloh.

Bangalore club tan captain Virat Kohli-a'n run 20 chiah siamin beisei a phak lo chhunzawm zel a, run 43 siamtu AB de Villiers leh run 35 siamtu Pawan Negi awm lo se RCB hi mualpho tur an ni.

Mumbai Indians bat hun a thleng a, an batsman te an chuti lua bik lo. Mahse captain Rohit Sharma-a'n a naute tan entawn tur a hnutchhiah a, run 56 ngawt siama a tawp thleng damin a team hi hnehna a chanpui. Mumbai club hian over 19.5-ah an target hi umphain wicket nga an hloh.

Zanin Inkhel Tur
Delhi Daredevils 08:00 PM Sunrisers Hyderabad