Pangana chhuahsan thei lo Man United

Chelsea leh Leicester City te an chetsual avangin Manchester United-in Premier League-ah pathumna nih theihna hun ṭha an nei a, amaherawhchu Old Trafford-ah Southampton nen 2-2 a an inhnehtawk avangin an awmna ngai panganaah bawk an la awm.

Thawhṭanni zan inkhelah hian Ole Gunnar Solskjaer-a hoten minute 90 chhung 2-1 in hma an hruai a, injury time minute ruknaah Saints substitute Michael Obafemi-a'n siphurh sutna goal a khung. Inkhel result avangin tun hnaia phur thar mek United an ngui a, Blues leh Foxes an phur phah thung.

Manchester United-in January 23-a Burnley an hneh loh hnuah chak loh an nei tawh lo a, match hnuhnung pathumah phei chuan goal thum vekin an chak - Premier League record thar a ni. Portuguese midfielder Bruno Fernandes awm hnuah United siam tharin an awm a, Paul Pogba leh Marcus Rashford te an dam tawh avangin Solskjaer-a naute inkhel a nung. United-in an hmaa awm apiang an hneh chho a, Mason Greenwood rawn che ṭha an kal fawr chho hle.

United phur vanglai hmaah Southampton an ding a, Saints hi nikum October thlaah Leicester City lakah 9-0 zetin tlawm mah se an insiamṭha tawh hle. Hemi hnu hian United elpui Chelsea leh Leicester City te chu an mualah an hneh tawh a, Covid-19 hnuah Manchester City pawh an hneh.

Southampton boss Ralph Hasenhuttl-a'n goal nawr na Man United lakah 'bus park' lam a ngaihtuah lo a, inkhelh ṭan phat aṭangin pressure a pe ngam. Saints tlarhmaten United tlarhnung te ball in pass thei lo turin an nawr a, Bruno Fernandes leh Paul Pogba te pawh hual chepin United midfielder-te'n pass sual an ngah hle. Ralph-a game plan hlawhtlinna a lang hma, minute 12-naah Danny Ings-a'n Pogba ball chhuhsakin Nathan Redmond tan a pe nghal a, English midfielder hian Stuart Amrstong tan pe lehin Scottish midfielder hian goal hmahruai khung nan a hmang.

Saints pressure pek ṭhat avangin Manchester United-in tun hnaia an khel an phak lo a, amaherawhchu an phur vanglai a nih bakah an mual a nih miau avangin mikhual team tan dan reng theih an ni lo. Minute 20-naah Marcus Rashford-a'n Pogba leh Martial te thawhrah sengin siphurh a sut. Saints talbuai laiin United-in an chhu nawn ngat a, Pogba leh Fernandes te hnathawh ṭhat chu Martial-a'n minute 23-naah hmahruaina goal khung nan a hmang.

Manchester United-in goal an chhuah lo a nih chuan pathumna dinhmun luah thei an ni a, amaherawhchu Saints-in point hlawhchhuah an tum tlat. Ralph-a hote tan Europe beisei theih a ni tawh lo a, relegate thei an ni tawh lo chungin Old Trafford-ah an theihna zawng zawng an chhuah.

United rawlthar duhawm Mason Greenwood chu first half tawp hmain Saints midfielder Oriol Romeu-a'n ball awm tawh loh hnuah a tlawh a, VAR hmanga ennawn a ni chungin hnawhchhuah a ni lo. Referee thutluknaah United boss Solskjaer a lawm lo hle.

Rashford leh Martial ten an hun ṭha neih an hlah a, Saints-in ball an inpek kual ngam avang leh 2-1 a nih avangin United dinhmun a him lo. Solskjaer-a'n Zirtawpni zana Crystal Palace an hmachawn tur leh Pathianni zana Chelsea nena FA Cup semifinal an khelh tur a thlir tel avangin player siksawi duh mah se an dinhmun a him miau loh avangin ṭum dang angin a thlak hma thei lo.

Chutichung chuan minute 63-naah Fred-a'n Pogba a thlak a, inhliam vangin Luke Shaw chu minute 75-naah loh theih loin Brandon Williams hmangin an thlak. Player panga thlak theih ni mah se vawi thum thlaka hman zawh tur a ni a, minute 84-naah Fernandes leh Greenwood aiah Scott McTominay leh Daniel James te luhtir an ni a, player dang an thlak thei tawh lo.

Pogba leh Fernandes ten inkhel an thunun theih lohna inkhelah Fred leh Tominay te an danglam lo a, minute 89-naah substitute Williams inhliam vanga lakchhuah a ngaih avangin United-in player 10-a an khelh tluan a ṭul. Midfielder Fred chu vei lamah hman a ni a, United an buai takzet.

Saints boss Ralph-a'n point hmuh duhin minute 87-naah Michael Obafemi a dah lut a, kum 20 mi Irish striker hi result thlak danglamtu a ni. United talbuaiin injury time-ah corner an chawi a, corner aṭanga ball kal chu Jan Bednarek-a'n tauh kawiin Obafemi-a'n siphurh sutna goal a khung.

Mikhual team-in point khat hlawhchhuah an phu a, minute 85-naah Redmond-a goal khung tur David de Gea-a'n dang lo phei se chuan Old Trafford-ah point thum an hlawh chhuak thei hial ang. Saints manager Ralph Hasenhuttl chuan, "Bul kan ṭan ṭha a, kan huaisen bawk. Ka thlirna aṭang chuan point hmuh kan phu takzet," tiin inkhelh banah a sawi a, inkhel entuten an pawmpui ang.

Manchester United boss Ole Gunnar Solskjaer chuan, "Kan goal chhuah hun kha a pawi hun lai ber a ni a, chutihrualin football-ah chuan a thleng fo. Keini pawh khatiang huna goal khung vang khan vawi tam kan chak a, inzirna tur a ni. Point thum hmu thei kan ni a, chutihrualin point thum hmuh erawh kan phu lo," tiin an khel ṭha lo tih a pawm.

Norwegian manager chuan sawi chhunzawmin, "Player-te rilru put hmangah rinhlelh tur kan nei lo. Chutihrualin Saints laka kan khelh danah a ṭha lai leh lawm lohna tur a awm a, a harsa zawngin zirlai kan zir. Kan insiamṭhat theih ka ring a, hemi kawngah hian ka naute ka ringtawk," tiin insiamṭhat an tum thu a sawi.