Mizoramin West Bengal an ngam
National Junior Football Championships (BC Roy Trophy)-ah Mizoram-in final lut turin Lalremmawia leh Lalruatpuia-te goal hmangin West Bengal 2-0 in an hneh.
Kumin hian Mizoramin football hmanga state leh state inelna hrang hrangah West Bengal hi vawi li an hmachhawn a, vawi thum hnehna an chang.
Mizoram hian final-ah Kerala 2-1 a hnehtu champion lai Punjab an hmachhawn dawn a, May 7 hian 2015 BC Roy Trophy rematch kan hmu dawn tihna a ni.
Goal hnih a tawk
Bhilai, Chhattisgarh-ah Mizoramin inkhel an thunun a, goal erawh a lut lawk lo. Minute 39-naah ding lam aṭanga N.Vanlaiphai rawlthar Ruatpuia cross chu Thingkah rawlthar Terema'n tauh pialin Mizoram goal khatna a khung.
Second half minute linaah Ramhlun South rawlthar R. Lalnunmawia chu box chhungah an man beh avangin penalty a hlawh chhuak a, Mizoram Police Football Academy player Ruatpuia'n penalty hi goal-ah a chantir. Goal hmahruai siamsaktu Ruatpuia penalty pet hi a vawi khatnaah pawm sak loin pet nawntir ni mah se N.Vanlaiphai rawlthar hi a talbuai phah lo.
Mizoramin inkhel an thunun avangin goalkeeper RS Lallawmzuala'n hna a nei lo a, inhliam vanga group match hnuhnung ber inlan lo Republic Veng rawlthar hian tun inelnaah goal a la chhuah lo.
Ṭawngṭaina rah
Mizoram coach C. Vanlalhriatrenga chuan, "Kan manager Hmingsanga hi a ṭang em em a, ṭawngṭainain thil a ti thei tih hi a thupui ber a ni. Final kan thlen theihna chhan pawh hi kan ṭawngṭaina rah niin ka hria a, nomawi kan chawi theih nan min ṭawngṭaipui zel turin Mizo mipui kan sawm bawk," tiin a sawi.
Inkhel chungchang sawiin Hriata chuan, "West Bengal hi inkhelh hma kha chuan kan huphurh ve tho a, amaherawhchu khelmualah erawh kan beisei angin an ṭha lo. Kawng engkimah kan chungnung a, clear chance pawh an nei lo," tiin Vanglaini a hrilh.
Mizoram hian final lut tura match li khel tawhin goal 11 an khung tawh a, goal khat chiah an la chhuah.
Thlirna Tawi
Semifinal - Nimin Inkhel Results
Mizoram 2 - 0 West Bengal
MIZ : Lalremmawia 39'; Lalruatpuia 49'
Punjab 2 - 1 Kerala
Final - May 5, Zirtawpni
Mizoram Vs Punjab